بنت سلفتي أماني السيد 2
**الجزء الرابع:**
الشارع اتقلب في ثواني، صراخي أنا وميادة جاب الناس من آخر الدنيا، والكل بقى يجري حوالين عربية عمار اللي سابوها دايرة في وسط الطريق. ميادة وقعت في الأرض من الصدمة وبقت تصرخ بهيستيريا: “عمار خطفوه! عمار ضاع مني يا ماما!”
الناس لمتنا ورجعنا الشقة وإحنا مش قادريين نقف على رجلينا. جوزي لما عرف باللي حصل، نزل جري على قسم الشرطة عشان يبلغ، وبالرغم من غضبه مننا، إلا إن الموضوع بقى يمس شرف العيلة والبيت. وطبعاً الخبر وصل لنوال وسلفتي وأحلام في نفس اللحظة، ولما طلعت نوال عندنا الشقة، مكانش على وشها علامات حزن، بل كانت بتبصلي بنظرة شماتة واضحة وقالت بصوت مسموع: “مش قولتلك يا سلفتي؟ اللي يتبني على خراب مبيعمرش، ودي أول عتبة في دعواتي أنا وبنتي عليكي”.
تاني يوم الصبح، جافا اتصال على تليفون ميادة من رقم غريب، فتحت بسرعة وهي بتعيط وسامعة صوت عمار وهو مخنوق وبيتكلم بالعافية: “ميادة.. ألحقيني.. هما عايزين…” وفجأة الخط قطع والصوت اختفى، بس قبل ما يقفل، سمعنا صوت وراه بيقول بلهجة حادة: “قول لأبوها يدفع اللي عليه عشان تخرج عايش”.
هنا اللغز بدأ يظهر؛ جوزي لما سمع الجملة دي بدأ يتحرى عن عمار وعن شغله، واكتشف الصدمة اللي مكانتش على البال.. عمار المحاسب صاحب العربية الفخمة، مكنش غني من ورث ولا من شطارة في شغله، عمار كان شغال مع ناس في تجارة مشبوهة، وكان مديون ليهم بمبلغ ضخم جداً، والعربية اللي كان مبهرنا بيها كانت بفلوسهم، وهما خطفوه عشان يضغطوا على أهله وعلينا ندفع الفدية اللي هي في الأصل حقهّم.
والدة عمار جت عندنا الشقة وهي بتلطم وبتصرخ وتقول لجوزي: “أبوس إيدك يا حاج، أنتوا ناس كبار وعندكم أرض، ساعدنا ندفع الفلوس عشان يرجعوا ابني، عمار ملهوش ذنب، هما اللي طمعوا فيه”.
جوزي بصلي وبص لميادة وقال بكسرة وحزم: “أنا ماليش دعوة بالاشكال دي، أنا قولت من الأول العريس ده وراه سر، وأنتوا اللي جريتوا ورا المظاهر وعميتوا عيونكم عن الحقيقة”.
ميادة دخلت في حالة انهيار كامل، مبقتش عارفة تعمل إيه، عريس أحلام اللقطة طلع كابوس ووراه مصيبة ممكن توديهم كلهم في داهية. وفي وسط الدوشة دي كلها، تليفون ميادة رن تاني، بس المرة دي مكنش عمار، كان رقم برايفت، ولما ردت سمعت صوت شخص بيقولها ببرود: “لو خطيبك حبيبك يهمك، اجهزي عشان تقابلينا بكرة، وأنتي اللي هتيجي لوحدك ومعاكي الفلوس، وإلا هتشوفيه في حتت.. وعنوان المقابلة هتوصلك رسالة بيه”.. وووووو
