خطيبي خد تليفوني واحنا خارجين

خطيبي خد تليفوني واحنا خارجين ومن غير ما أخد بالي حول لنفسه 14 الف جنيه كانوا على المحفظة عندي، تحويشة ست شهور من مرتبي، كنت عايزة أساعد أهلي في جهازي وبحوش الفلوس دي من مرتبي، ست شهور وانا بحرم نفسي من كل حاجة عشان اجمع المبلغ دا وهو جه في لحظة خده من غير وجه حق وكان فاكر اني مش هعرف لأنه حذف رسالة التحويل ومفكر ان الموضوع انتهى على كده!

انا اسمي شهد، عندي 25 سنه وبشتغل مدرسة في حضانه عشان اساعد اهلي في جهازي.
اتخطبت من سنه ل تامر جارنا.
المفروض انه شخص محترم وابن ناس جيرانا معروف عنهم انهم كويسين.
بس اكتشفت ان متقولش على حد كويس غير لما تعاشره بجد.
كنت عارفه ان ظروف اهلي صعبه وحاولت اساعدهم واحوش من مرتبي عشان نقدر نجمع حق الجهاز بتاعي.
وفي يوم كنت بتكلم مع تامر وحكيت له اني قدرت احوش 14 الف جنيه في محفظة فودافون كاش.
وبحسن نيه قولت وسط الكلام ان باسورد المحفظة هو تاريخ خطوبتنا من كتر ما اليوم دا مميز في حياتي.
كل حاجة كانت طبيعيه لحد ما تامر طلب من بابا اننا نخرج النهاردة عشان ملاحظ اني مضغوطه في الشغل ومحتاجة اغير جو.
وزي اي بنت فرحت عشان خطيبي هيخرجني.
مع ان كل مرة كنا بنخرج فيها كان تامر بيتحجج بأي حاجة عشان انا اللي ادفع فلوس الخروج.
مرة يقول نسى محفظته
مرة حط اخر فلوس كانت معاه في تشطيب الشقة
مرة الفلوس وقعت منه
كل مرة كانت بتبقى بحجه مختلفه وانا بحاول اصدقه وامشي الدنيا.
قعدنا في كافيه وكنت ملاحظة ان تامر مش طبيعي وقالي انه قلقان على والدته عشان كانت تعبانه قبل ما ينزل من البيت وتليفونه فصل شحن وطلب مني تليفوني عشان يكلم والدته ويطمن عليها.
طبعا انا اديته تليفوني وهو خد التليفون وطلع يتكلم برا الكافيه عشان الصوت.
وبعد شويه رجع وهو مبسوط وقالي انه اطمن على مامته وقعدنا شويه ورجعني البيت وانا مش ملاحظة اي حاجة غريبه.
بالليل وانا نايمه على السرير لقيت رساله جايه من فودافون بهدية عدد من الدقايق مكافئة على تحويل الكاش اللي انا عملته النهاردة.
استغربت لاني معملتش اي تحويل وفتحت المحفظة اتأكد ولقيت الرصيد صفر!!
14 الف جنيه تحويشة ست شهور طارو في لحظة!!
راحوا فين؟
اتصلت بخدمة العملا وانا جسمي كله بيرتعش وقالولي اني عملت تحويل النهاردة وانا ازعق واقولهم محصلش وانتوا حرام,يه
الموظف قالي الرقم اللي اتحول عليه الفلوس والساعه والدقيقه.
جسمي كله تلج..
دا رقم تامر خطيبي..
ونفس الساعة اللي كنا خارجين فيها..
وتقريبا نفس الوقت اللي خد مني التليفون عشان يكلم مامته برا الكافيه..
الدنيا لفت بيا وانا مش قادرة استوعب وناديت على ماما تجيلي بسرعه.