مرات صاحب جوزي بقلم أماني السيد 2

وقفت هناء في البلكونة، الهواء البارد بيخبط في وشها، بس المرة دي ما حسيتش بالبرودة.. حسيت بإن السخونة اللي كانت بتاكل في صدورها بدأت تهدى. الصوت الثلجي اللي كلمت بيه محمود كان مجرد البداية، بداية كسر "الهيبة" الكدابة اللي عاش يبنيها على حساب صحتها وشقاها. في إسكندرية، كان الجو جوه أوضة الفندق يتعدى مرحلة الغليان. محمود كان بيلف حوالين نفسه زي المجنون، يلبس الجاكت ويقلعه، يمسك الموبايل يحاول يتصل بهناء يلاقي الخط مقفول، يتصل بـ "أحمد" الصبي يلاقي عبد الصمد قاعد حاطط رجل على رجل قدام باب الورشة ومستني. عبير كانت واقفة وراه، حاطة إيدها في وسطها، وعيونها اللي كانت مالياها الفرحة بالدهب الجديد بدأت تتقلب لنظرة شك وجشع: ـ "جرى إيه يا محمود؟ هو أنت ضاحك عليا ولا إيه؟ أنت مش قايلي إن الورشة ماشية زي الس/كين في الحلاوة وإنك العمدة بتاع المنطقة؟ إيه كلام الديون والشرطة اللي بتقوله ده؟" محمود تلفّت ليها ووشه أحمر من الغيظ، وزعق فيها لأول مرة: ـ "أنتِ تسكتي خالص دلوقتي! مش وقت كلامك ده! أنا رايح في مصيبة بسببك وبسبب الفلوس اللي اتصرفت!" عبير قربت منه بخطوة تهديد، وصوتها اتغير تمامًا من النعومة للصوت البشِع اللي كان مخفي ورا الضحكات: ـ "بسببي أنا يا محمود؟ هو أنا اللي جيت تحايلت عليك عشان تتجوزني؟ ولا أنت اللي جيتلي بتقول معاي فلوس ومش عارف أوديها فين ونفسي أتدلع؟ اعتدل في كلامك يا حبيبي.. أنا مش هناء اللي كانت بتعديلك وتداري عليك، أنا عبير! وفلوسي ومؤخري ودهبي خط أحمر، ولو فاكر إنك هتاكل حقي زي ما أكلت حق الغلبانة اللي هناك، تبقى غلطان!" محمود اتسمر مكانه. النظرة اللي في عين عبير دلوقتي كانت هي هي النظرة اللي كان خايف منها طول عمره.. نظرة الست اللي متجوزاه عشان مصلحة، عشان قرشين وخلاص. في اللحظة دي بس، افتكر هناء وهي بتداري على لبسها المقطع، افتكرها وهي بتعمله الأكل اللي بيحبه حتى وهو راجع متأخر، افتكرها وهي بتستحمل نكده وعصبيته وتقول "معلش بيبني مستقبلنا". بس الفأس كانت وقعت في الراس.. والندم في الوقت ده ملوش أي قيمة. خد شنطته بسرعة ونزل يجري على العربية عشان يلحق يسافر القاهرة، وساب عبير في الفندق بتتأفأف وهي بتبص للدهب اللي في إيدها بتتأكد إنه حقيقي مش فالصو. في القاهرة، وفي تمام الساعة واحدة بعد نص الليل، عربية محمود فرملت بصوت عالي قدام الورشة. المنظر كان كابوس بالنسبة له. الحاج عبد الصمد، الراجل الخمسيني الثقيل اللي المنطقة كلها بتعمله ألف حساب، قاعد على كرسي خيزران قدام باب الورشة، وجنبه أربعة من رجالته القوايا، وعربيتين نقل كبار واقفين سادين الشارع. الصبيان بتوع الورشة واقفين في جنب مرعوبين ومحدش قادر ينطق. محمود نزل من العربية وهو بيبلع ريقه، وبيرسم ابتسامة صفرا على وشها: ـ "يا فتاح يا عليم يا رزاق يا كريم.. إيه يا حاج عبد الصمد؟ المنظر ده في ذمتك؟ إحنا بيننا عشرة وطبلية واحدة، تبعت تجيبني من السفر كدة؟" الحاج عبد الصمد ما قامش من على الكرسي، ونفخ دخان الشيشة في وش محمود ببرود قاتل: ـ "العشرة دي يا أسطى محمود كانت مع الست الأصيلة اللي كانت شايلة اسمك وحافظة مالك.. الست اللي كانت بتيجي بنفسها تاخد الحساب وتراجع السجلات بالقرش، وكانت بتترجاني أصبر عليك لما الشغل يريح.. إنما أنت؟ أنت طلعت عيل، مابتصونش النعمة." محمود حس بدمه بيغلي، وقال بصوت مخنوق: ـ "هناء! هي اللي جتك؟" الحاج عبد الصمد وقف، وبقى أطول من محمود بمراحل، وضغط على عصايته الخشب وقال بصوت هز الشارع: ـ "الست هناء ما جتش تشتكي، الست هناء جت تديني حقي اللي أنت كنت هتبدده! جت تفهمني إن الشغل اللي بالآجل ده رايح على فساتين وفسح، مش على بضاعة وورشة! الكمبيالة بـ 60 ألف جنيه تستحق النهاردة، والـ 60 ألف الثانية الشهر الجاي.. هات الفلوس كاش يا محمود، يا إما العربيات دي هتحمل الخشب اللي جوه كله، وتطلع على المخازن عندي." ـ "يا حاج عبد الصمد صلي على النبي! أنت عارف إن السيولة مش معايا دلوقتي، امهلني أسبوع بس وأنا..." ـ "ولا دقيقة!" قطع كلامه عبد الصمد بحزم. "الخشب يترفع، أو الباب يتقفل بالشمع ونروح نعمل محضر تبديد بكرة الصبح في القسم.. اختار لك واحدة." محمود كان هيتجنن. الخشب لو ارفع، الطلبية الجديدة بتاعة الشقق المفروشة هتلغى، والشرط الجزائي فيها 40 ألف جنيه.. يعني إفلاس تام! ماكانش قدامه غير إنه يفتح الخزنة وياخد الكام ألف اللي باقيين، ويتصل بجمعيته القديمة يترجاهم يرقوه، واستلف من طوب الأرض ليلتها بفوائد عشان يجمع الـ 60 ألف ويقدمهم للتاجر وهو إيده بتترعش. عبد الصمد أخد الفلوس، وعدهم ببطء، وحطهم في جيبه: ـ "تمام يا محمود.. كدة الكمبيالة الأولى اتسددت. فاضل 60 ألف الشهر الجاي.. ولو متدفعوش في ميعادهم، مش هقعد على القهوة.. هقعدك أنت في البيت." مشي عبد الصمد ورجالته، وسابوا محمود واقف في وسط الشارع الشبه فاضي، وعرقه مغرق قميصه الجديد، وجيبه مفيش فيه ولا مليم أحمر. الصبيان بصلوه بقلة حيلة ومشيوا هم كمان، وفضل هو لوحده، واقف قدام الورشة اللي بقت زي المقبرة. تاني يوم الصبح، هناء كانت قاعدة في بيتها. أيوة، رجعت بيتها.. البيت اللي محمود افتكر إنها هتهربه منه. كانت قاعدة بتنضف الشقة، غسلت الملايات القديمة، فتحت الشبابيك عشان الشمس تدخل، وعملت للولاد فطور نضيف. زياد وليلى كانوا بيلعبوا حواليها، والبيت كان فيه هدوء غريب.. هدوء ما قبل العاصفة. الساعة جات الظهر، الباب اتفتح بهبدة قوية. دخل محمود، شكله كان يرثى له. عينيه حمرا من السهر، هدومه مكسرة، ووشه شاحب زي الج/ثة. أول ما شافها قاعدة بتطرز مفرش بالهدوء ده، جن جنونه. قرب منها وعيونه بتطلع شرار: ـ "أنتِ يا زفتة أنتِ! أنتِ عملتي إيه؟ بقى تروحي للحاج عبد الصمد وتقوميه عليا؟ تخليه ياخد مني تحويشة عمري والفلوس اللي حيلتي؟ أنتِ فاكرة نفسك مين؟" رفع إيده وكان هيضربها بالقلم على وشها. هناء ما تحركتش من مكانها ولا رمشت. رفعت عينها فيه، وبصت لإيده المرفوعة في الهواء بنظرة سارحة، وقالت بصوت هادي وبطيء: ـ "اضرب يا محمود.. نزل إيدك على وشي، عشان أطلع من هنا على النيابة مباشرة، بتقرير طبي ومحضر تعدي، واخد شقتي دي بالتمكين فوراً لأن معايا الولاد، وأرميك أنت وعروستك في الشارع." إيد محمود اتجمدت في الهواء. النظرة اللي في عين هناء مكنتش نظرة الست اللي خايفة تنضرب.. كانت نظرة ست مستنية الغلطة عشان تطبق على رقبته. نزّل إيده بالراحة وهو بيتنفس بصعوبة: ـ "أنتِ اتجننتي يا هناء؟ أنتِ كدة بتخربي بيتنا! بتخربي البيت اللي السنين اللي فاتت دي كلها كنا ببنينه!" ابتسمت هناء ابتسامة ساخرة وقالت: ـ "بيتنا؟ أنت نسيت ولا إيه يا محمود؟ أنت اللي هديت البيت ده لما أخدت قمتي وقوتي وفلوس شقايا ورحت تبني بيه بيت تاني لـ 'مرات صاحبك'. أنت اللي قلتلي بلغة البرود بتاعتك: 'مخدتش حاجة غصب عنك.. وعايز أعيشلي يومين'. أنا بس بساعدك تعيش اليومين دول.. بس على أصولهم." محمود قعد على الكرسي الخشب وهو حاطط رأسه بين إيديه، بصوت مكسور حاول يلعب على عاطفتها: ـ "هناء.. إحنا بيننا زياد وليلى.. إزاي تهون عليكِ الورشة اللي بتاكلنا عيش؟ عبد الصمد أخد كل الفلوس اللي معايا، ومفيش في جيبي جنيه واحد أشتري بيه أكل للولاد! أنتِ كدة بتنتقمي مني ولا بتدحري عيالك؟" هناء قامت وقفت، وراحت ناحية المطبخ، جابت كباية مية، وحطتها قدامه على الترابيزة: ـ "الولاد أكلهم وعيشهم في رقبتك يا محمود.. ولو قصرت في مصاريفهم، القانون بيكفل لي نفقة مأكل وملبس وأجر حضانة، وساعتها الحبس هيبقى مباشر." وقفت قدامه وربعت إيدها: ـ "وبعدين أنت زعلان ليه؟ أنت مش بكرة الصبح رايح تجيب العروسة الجديدة الشقة التانية اللي أصلها ملك لرفعت الله يرحمه؟ روح لـ عبير.. خليها تديك من الدهب والفلوس اللي اشتريتهالها بفلوسي! مش هي اللي 'تظلعك' وتظلعها؟ ورينا بقى شطارتها لما الراجل يقع!" محمود رفع رأسه وبصلها بذهول: ـ "أنتِ عرفتي منين موضوع ملكية الشقة والورشة؟" هناء ماليت عليه وقالت بصوت واطي جداً في أذنه: ـ "أنا عارفة كل حاجة يا محمود.. عارفة إن الأوراق الرسمية بتاعة الورشة والشقة لسه باسم ورثة رفعت، وعارفة إن أخته المظلومة اللي أنت وعبير أكلتم حقها، رافعة عليك وقضية فرز وتجنيس بكرة الصبح في المحكمة.. بالأوراق الرسمية والدفاتر الحقيقية اللي كانت في خزنتك." محمود اتنفض واقف زي الملسوع: ـ "أنتِ اللي خادتي صور الدفاتر من الخزنة؟ أنتِ اللي فتحتيها؟" ـ "أنا ما سرقتش حاجة يا محمود.." وقفت بثبات وقالت: "أنا بس رجعت الحق لأصحابه.. عشان زي ما أنت حبيت تكون 'كبير' في نظر الناس على حسابي، القضاء هيعرفك حجمك الحقيقي قدام الناس." في اللحظة دي، تليفون محمود رن تاني. كانت عبير. محمود رد وهو حاسس إن الدنيا بتلف بيه: ـ "إيه يا عبير؟" صوت عبير جه عالي ومزعق، لدرجة إن هناء كانت سامعة كل كلمة وهي واقفة مكانها: ـ "محمود! أنت فين؟ في ناس جايبين محضّرين ورجالة من المحكمة واقفين تحت العمارة هنا، وبيقولوا الشقة دي عليها حجز تحفظي لصالح ورثة رفعت! أنت ضاحك عليا ويا ترى الشقة مش بتاعتك؟ تعال فوراً اخلص!" محمود مسك رأسه وكان هيقع، بص لهناء اللي كانت بتبصله بنظرة نصر صامتة، مفيهاش أي ذرة شفقة. هناء قربت منه بالراحة، أخدت مفاتيح الشقة من على الترابيزة، وحطتها في جيبها وقالتله ببرود: ـ "يلا يا محمود.. العروسة مستنياك تحت عشان 'تحل' المشكلة.. ما يصحش تروح وإيدك فاضية المره دي كمان." محمود بصلها وهو مش قادر يتنفس، حس إن السلسلة اللي هناء لفتها حوالين رقبته بدأت تتخنق بجد، وإن كل خطوة مشيها في طريق النذالة، كان قدامها خطوة تخطيط هادي من ست قررت إنها مش هتموت مكسورة.. لكن هتعلم عليه العمر كله. محمود خرج من الشقة زي المجنون، يجر رجليه بالعافية على السلم، رأسه كانت بتغلي من كتر التفكير والضغط. كل حاجة حاسبها كانت غلط، فكر إن "هناء" هتفضل الست المكسورة اللي بتعيط في الصالة وبتستحمل الإهانة عشان الولاد، مكنش يعرف إنها دراسة كل خطوة وعارفة نقط ضعفه أكتر من نفسه. وصل محمود عند العمارة اللي فيها الشقة التانية، شقة "رفعت" الله يرحمه اللي عبير قاعدة فيها. المنظر تحت العمارة كان يقطع الخلف. المحضرين واقفين مع رجالة من المحكمة، وأخت رفعت ـ "سعاد" ـ واقفة ومعاها محامي شديد، وجيران الشارع متجمعين بيتفرجوا وبيهمسوا على اللي بيحصل. أول ما محمود قرب، عبير نزلـت تجري من على السلم وهي لابسة عبايتها، وشها أحمر من الغضب والفضايح، وصرخت فيه قدام الناس كلهم: ـ "تعال شوف يا أسطى محمود! تعال شوف المهزلة اللي أنا فيها! المحضرين جايبين أمر حجز على الشقة والعفش، وبيقولوا إنك مالكش أي حق هنا، وإن الشقة دي ملك الورثة شرعًا وقانونًا!" محمود اتوتر وقرب من المحامي بتاع سعاد، وبدأ يتكلم بصوت يرعش: ـ "إيه يا أستاذ؟ في إيه؟ الشقة دي رفعت الله يرحمه كان كاتبلي تنازل عنها مقابل ديون كان واخدها مني قبل ما يموت!" سعاد أخت رفعت قربت منه وبصت له بإزدراد وصوتت في وشه: ـ "تنازل إيه يا حرامي يا نذل؟ رفعت أخويا مات وهو مالوش جنيه واحد عندك! أنت استغليت إن عبير جاهلة وما بتفهمش في الأوراق، واشتريت خاطرها بعصايتين ودهب مغشوش عشان تاكل حق عياله الغلابة وتسيطر على الشقة والورشة! بس ربك بالمرصاد.. الأوراق والدفاتر الحقيقية وصلت للمحكمة، والقاضي أصدر أمر حجز تحفظي على الشقة والورشة لحد ما التريكة تتصفى بالكامل!" محمود بلع ريقه وبص للمحضر، المحضر قدم له الورقة: ـ "أنت يا أسطى محمود مطلوب للشهادة وإبراز الدفاتر الأصلية للورشة يوم الأحد الجاي، والشقة دي مقفولة وممنوع حد يدخلها لحين انتهاء النزاع." عبير اتجننت، ومسكت في قميص محمود وضربت بإيدها على صدره: ـ "يعني إيه؟ يعني أنا أطلع في الشارع؟ أنت مش قلتلي إنك أمنتي وسترتني بعد رفعت؟ طلعت حافي ومحيلتكش حاجة وجاي تتباهى عليا بفلوس مراتك الأولى؟ ترجعيلي دهبي وفلوسي فورًا يا محمود! أنا مش هقعد معاك دقيقة واحدة!" الجيران بدأوا يتهامسوا ويضحكوا عليه: ـ "شوف الراجل اللي كان عامل فيها عمدة.. طلع واكل حق الأيتام وشقا مراته!" ـ "سبحان مغير الأحوال.. كان ماشي يتنطط بفلوس الجمعية، أهو لبس في الحيط!" محمود حس بظهره بيتكسر، كبريائه اللي كان بيتباهى بيه قدام هناء اتمسح بيه الأرض في نص الشارع. اتزق من عبير، ووجر شنطته الصغيرة اللي كان وخدها من شقته، وخرج من الشارع وهو سامع دعوات الناس عليه وشتائم عبير اللي لحقته لحد أول الشارع. في الوقت ده، هناء كانت قاعدة في بيتها، بتشرب كباية شاي بنعناع وبتبص للولاد وهما بيرسموا في كراساتهم. تليفونها رن، كان المحامي اللي هي عينته عشان يتابع قضية الورثة ونفقة الولاد. ـ "أهلاً يا أستاذ.. ها، إيه الأخبار؟" المحامي ضحك وقالها: ـ "كل خطة مشيت زي الساعة يا مدام هناء. المحكمة نفذت الحجز التحفظي على الشقة، ومحمود دلوقتي ملوش أي صفة رسمية في الورشة غير إنه 'مُدار' لحد ما يتحدد نصيبه الحقيقي، وطبعاً بالدفاتر اللي حضرتك قدمتيها، طلع عليه مديونية للورثة تتجاوز 80 ألف جنيه كان واكلها عليهم." هناء اتنفست بتنهيدة طويلة وقالت: ـ "والنفقة وقضية التمكين؟" ـ "قضية التمكين شغالة، وخلال أيام الشقة هتبقى باسمك وباسم الولاد بحكم قضائي. أما بالنسبة للنفقة، فإحنا رفعنا دعوى حبس بموجب الدخل الحقيقي للورشة قبل النزاع، ومحمود قدامه خيارين: يا يدفع المصاريف والنفقة كاش، يا هيدخل السجن." هناء قفلت مع المحامي، وبصت لزياد وليلى وقالت في سرها: *"حقكم مش هيضيع، ولا قرش واحد من اللي استخسرته في نفسي وفيكم هيروح لهدر."* الساعة جات تسعة بالليل. محمود كان قاعد على قهوة بلدي بعيدة عن منطقته، شكله يقطع القلب. القميص اللي كان منقيه بعناية بقى متوسخ ومكسر، جيبه مفيش فيه غير خمسين جنيه، ومفيش مكان يروح فيه. عبير قفلت الشقة وغيرت الكالون وراحت لبيت أهلها وهي بتتوعده بالقضايا، والورشة عبد الصمد قافلها بقفل ورجالته واقفين عليها، وشقته الأولى هناء قفلتها ومابتفتحش لحد. قام من على القهوة، وجر رجليه ورجع لعمارة هناء. طلع السلم بتعب، وخبط على الباب بصوت ضعيف، مكنش الخبط الفرعوني اللي كان بيخبطه زمان، كان خبط واحد شحات بيطلب الرحمة. هناء فتحت الصبانة بتاعة الباب وبصت منه: ـ "مين؟" صوت محمود جه مكسور ورطب بالدموع: ـ "هناء.. افتحي يا هناء، أنا محمود.. افتحي الله يخليكي، أنا ماليش مكان أروح فيه." هناء فتحت الباب بس فضلت واقفة على العتبة، راباطة إيدها، وباصة له بنظرة خالية من أي مشاعر: ـ "عايز إيه يا محمود؟ مش أنت قلتلي خفي وابعدي عني وسيبيني أعيشلي يومين؟ وأنت كل اسبوع هتجي تزورني وتشوف الولاد؟ النهاردة مش ميعاد الزيارة." محمود نزل على ركبه قدام الباب، ومسك في طرف عبايتها: ـ "أنا غلطان يا هناء! اتعميت.. الشيطان غواني! عبير ضحكت عليا وأخدت دهبي وفلوسي ورمتني في الشارع لما عرفت إن الورشة عليها ديون! أنتِ الأصل يا هناء.. أنتِ الست الوحيدة اللي صانتني وحافظت عليا! سامحيني وحقك عليا وعلى راسي من فوق!" هناء شالت طرف عبايتها من إيده بالراحة، وقالت بصوت ثابت زلزل كيانه: ـ "أنا مكنتش 'الأصل' لما كنت بستخسر في نفسي الطقم الجديد وأنت بتصرف فلوسي على الفسح.. مكنتش 'الأصل' لما قلتلي ببرود إنك عايز تتدلع ورعيت ست تانية بفلوس شقايا.. أنت مائرتش قيمتي غير لما الخرابة اللي بنيتها على حسابي اتهدت فوق دماغك." ـ "يا هناء عشان خاطر زياد وليلى! ارحميني، أنا اتفضحت في المنطقة والديون حنقاني، عبد الصمد هيحبسني وسعاد رفع عليا قضايا!" هناء تبسمت ابتسامة هادية وقالت: ـ "الولاد بخير يا محمود، بياكلوا وبيشربوا من الخير اللي ربنا يعلم أنا حوشته إزاي. والديون دي ديونك أنت.. والفضايح دي عمايلك أنت. أنت اخترت تتباهى بفلوسي، واستكثرت عليا حتى كلمة طيبة.. دلوقتي بقى، اخرج بره وحل مشاكلك بنفسك، زي ما سبتني أحل كسرتي بفرردي." محمود صرخ بوجع: ـ "يعني هترميني في الشارع يا هناء؟" هناء بصت له للمرة الأخيرة وقالت: ـ "أنا مرميتكش في الشارع يا محمود.. أنت اللي رميت نفسك لما بعت اللي صانتك واشتريت اللي باعتك في أول مطب. والشارع ده.. هو المكان الوحيد اللي يليق بلي بيخون الأمانة." هناء هبدت الباب في وشه، وقفلت الكالون بالترباس. محمود فضل قاعد على الأرض ورا الباب، يسمع صوت ضحكات عياله جوه وهما بيلعبوا مع أمهم، صوت الحياة اللي كان فاكر إنه يملكها بفلوسه وغروره، ودلوقتي بقى مطرود منها للأبد. وقفت هناء ورا الباب، مسحت دمعة واحدة قديمة كانت باقي من أيام الضعف، واستنشقت هواء نضيف.. هي عرفت إن الحق رجع، وإن الست اللي بتعرف تقف على حيلها وتحسب خطواتها بالصح، مفيش راجل في الدنيا يقدر يكسرها.