خايف مراتك تمشي أماني السيد 1
انت مش خايف مراتك تمشى وتسيبك بعد كل اللى بتعمله فيها ده
ـ لا مراتى ماتقدرش تعيش يوم واحد من غيرى
مراتى دى عابده عندى وعند عيالى من مراتى الاولى انا اتجوزتها عشان اغيظ منال واخليها ترجعلى تانى
ـ وانت طلقت منال ليه
ـ عشان تعبت من مسئوليه البيت والولاد وانا خلاص ريحتها من مسئوليتهم وجبتلها خدامه بدون أجر تغسلهم وتذاكرلهم وتعمل كل حاجه ومنال تيجى تزورهم وقت ما مزاجها يجلها
ـ طيب انت علاقتك بمنال ايه
ـ ردتها تانى لعصمتى عند مأذون بس فاضل اعملها فرح هى شارطه كده عايزه تعيش حياتها كأنها عروسه وتعمل شهر عسل من اول وجديد
ـ طيب ومراتك هتعمل معاها ايه
ـ ولا حاجه هتفضل تربى الاولاد وانا كل شهر هبعتلها المصاريف بتاعتها وكده كده انا اصلا مسافر وهاخد منال معايا ونعيش حياتنا بجد وانا أصلا مش عايز عيال تانى انا معايا ولد وبنت من منال وخلاص إنما هبه خلاص كفايه عليها انى اتجوزتها ومبقاش اسمها عانس زى ماكانت بتتعاير وهى هتخاف تتطلق أصلا عشان ماحدش يعايرها تانى بكلمه مطلقه بعد عانس
عشان كده بقولك انا مش خايف من حاجه
دى لما يتيجى تكملنى فى خلفه بقولها سنك كبر حمل وخلفه ايه مش هتستحملى سيبى الحمل والولاده لبنات سنهم اصغر وغير كده عايزه تخلفى وتهملى فى عيالى لأ انسى انتى دورك دلوقتي كله مع عيالى ربيهم واعتبريهم ولادك وهما كمان هيحبوكى
كل مره ارميلها الكلمتين دول تسكت وماتفتحش بوقها
انا اللى بعتبرها مراتى بجد هى منال وهى فعلاً اللى تستاهل الدلع كله
ـ وهتقول لهبه انك رجعتها لعصمتك
ـ طبعاً هفجأها بعد الفرح وانا داخل عليها شايل منال امال انا متجوزها ليه مش عشان تخدمهم وتخدم منال
ـ ومنال هتوافق تعيش معاها
ـ دى رغبه منال أصلا عشان تتأكد ان علاقتى بهبه زى ما انا بحكلها مجرد مربيه
ـ وافرض هبه اتكلمت واعترضت
ـ هقولها انتى عايزة تحرمى العيال من امهم وماتنسيش انك زوجه تانيه وكنتى عارفه انى مطلق ورضيتى بالوضع والمطلق ممكن فى أى لحظة يرجع لطليقته
ـ وهبه هترضى بالوضع ده وتوافق تخدم منال؟
ـ هبه طيبة وغلبانة، والأهم من كده إنها بتخاف من كلام الناس. أنا عارف نقطة ضعفها كويس، الست اللي بتتجوز في سن متأخر بتبقى شايفة الجوازة دي فرصة العمر اللي مش هتعوضها، ومستعدة تستحمل عشان المركب تمشي. لما تلاقيني حطيتها قدام الأمر الواقع، مش هتلاقي قدامها غير إنها توافق وتطيع.
