يوم فرحي حكايات روماني مكرم 2
حكايات رومانى مكرم تابعو صفحه رومانى مكرم
بلعت ريقي وحاولت أجمع كل ذرة قوة فاضلة فيا، وقولت للراجل في التليفون بثبات هز الشارع كله: “أنا نازلة حالاً.. الفلوس والشفرة معايا، بس لو حد لمس شعرة من بنتي، هرمي السلسلة في أقرب بلاعة وهكسر الشريحة، والمليون دولار يغوروا وتغوروا معاهم”.
قفلت السكة قبل ما ينطق. الأستاذ فريد بص لي بإعجاب وخوف في نفس الوقت، وناولني ورقة صغيرة وقال لي بصوت واطي: “سمر، دي أرقام الحساب والشفرة كاملة بعد ما دمجت أرقام السلسلة مع أرقام طارق.. أنا كلمت مدير البنك ده معرفة شخصية، الحساب ده متجمد ومينفعش يتسحب منه مليم برة مصر إلا بوجودك بشخصك، والشرطة الدولية (الإنتربول) بلغتهم بالعملية من خمس دقايق.. الميكروباص اللي تحت ده محاصر، بس هما مش هيتحركوا إلا لما تنزلي عشان يمسكوهم متلبسين بخطف أو تهديد”.
شيلت مريم اللي كانت بتعيط وخايفة من توتري، وقولتلها: “متخافيش يا قلب ماما، إحنا بنلعب لعبة وهنعدي الشارع جري، ماشي؟”
نزلت السلم ورجلي مش شايلاني، بس قلبي كان زي الحديد عشان خاطر بنتي. فتحت باب العمارة، وشوفت الميكروباص الأبيض واقف، وبابه اتفتح وخرج منه راجلين بعضلات ولابسين نظارات سوداء، وعينيهم عليا.
أول ما رجلي لمست الرصيف، وقبل ما يتحركوا خطوة واحدة ناحيتي، الشارع اتقلب في ثانية!
تاكسي كان جاي بسرعة قفل على الميكروباص من قدام، وعربية ملاكي تانية قفلت من ورا، ونزل منهم رجالة المباحث بلبس مدني والمسد..سات في إيديهم وصوتهم زلزل المكان: “اثبت مكانك أنت وهو! الشرطة!”
الراجلين اتسمروا مكانهم وترموا على الأرض في أقل من دقيقة، والناس اتجمعت في الشارع، وأنا خدت مريم في حضني وقعدت على الرصيف وأنا بعيط وبضحك في نفس الوقت من كتر الهستيريا. الأستاذ فريد نزل جري واحتضنّا وقال لي: “خلاص يا سمر.. الكابوس انتهى.. العصابة كلها وقعت، وطارق وأمه هيلبسوا حبل المشنقة في قضايا غسيل أموال وتزوير وتهديد”.
بعد أسبوع كامل من التحقيقات والشهادات في النيابة، كنت قاعدة في شقتي القديمة.. شقتي الصغيرة الإيجار اللي ريحتها حيطانها بتفكرني بأيام الشقا بس بطعم الأمان. مريم كانت بتلعب جمبي بعروستها وضحكتها مالية المكان.
تليفوني رن، وكان الأستاذ فريد: “مبروك يا سمر، النيابة حفظت كل التهم ضدك بصفتك ضحية ومبلّغة، والفلوس المليون دولار رجعت لخزينة الدولة، وأنتي ليكي مكافأة مالية محترمة من الوزارة لجهودك في كشف شبكة غسيل الأموال دي.. طارق وأمه اتنقلوا السجن العمومي على ذمة القض..ية”.
