واحنا خمس سنين أماني سيد 2
دخلت فوزية وبنتها الصالون، بس المرة دي قعدوا على طرف الكراسي، مكسورين، وعينيهم مش قادرة تيجي في عين أمي. البنت كانت بتبص للأوضة وبتبص لأمي بنظرة رجاء، كأنها بتدور على “أحمد” في كل ركن، بس أحمد كان جوه أوضته، سامع كل حاجة، والسكوت اللي طالع من أوضته كان أرعب من أي صريخ.
أمي قعدت ببرود يحسدوها عليه، حطت إيد على إيد وبصت لفوزية وقالت:
ـ “سامعاكي يا فوزية.. قولي اللي عندك.”
فوزية بدأت تتكلم وصوتها بيرتعش، والدموع نزلت من عينها:
ـ “والله العظيم ما كنت أعرف.. عبد العزيز جالي من يجي عشرين سنة، قال لي إنه مقطوع من شجرة، معندوش أهل ولا كان متجوز قبل كده. أنا كنت أرملة ومعايا البنت دي طفلة رضيعة، وهو اتقدم لي وشال البنت ورباها وكتب لها الشقة باسمها. أنا اتخدعت فيه زيكم.. عشت مع راجل كداب، بنى حياته الجديدة على أنقاض حياتكم!”
البنت هنا قاطعت أمها وهي بتعيط بحرقة، وبصت لأمي وقالت:
ـ “يا طنط.. أنا ذنبي إيه؟ أنا عمري ما شفت منه غير الحنية، وعمري ما تخيلت إن الفلوس اللي كبرتني وعلمتني دي حق ناس تانية! أنا حبيت أحمد لخطواته، لأدبه، لقصة كفاحه اللي كان بيحكيلي عنها وفخور بيكي فيها.. مكنتش أعرف إن الكفاح ده كان بسب أبويا.. أقصد الراجل ده!”
أمي فضلت ساكتة، ملامحها متأثرتش بدموعهم، وبصت للبنت بنظرة حنان فيها حزن وقالت لها:
ـ “إنتي يا بنتي مالكيش ذنب، والظلم مش ذنب اللي اتولد فيه.. بس ذنب اللي رضي بيه. عبد العزيز عايرني بالجهل، وساب عيال لحمه ودمه يناموا جعانين، وراح يربي بنت مش بنته ويصرف عليها شقاه علشان يثبت لنفسه إنه عاش عيشة أحسن. ربنا مبيسبش يا بنتي.”
فوزية قامت وقربت من أمي، وطت على إيدها وقالت بتوسل:
ـ “أنا طردته من الشقة يا أم أحمد.. طردته بالهدوم اللي عليه ورميت له حاجته في الشارع بعد ما مشيتوا. الشقة شقة بنتي وهو ملوش حاجة عندي خلاص. أرجوكي بلاش تخربي بيت بنتك وابنك.. أحمد وضحى مالهمش ذنب في قرف عبد العزيز!”
في اللحظة دي.. باب الأوضة اتفتح.
خرج أحمد.. ملامحه كانت متغيرة، عينه حمرا من قلة النوم والعياط، بس كان فيه ثبات غريب في مشيته. وقف وبص للبنت “ضحى” اللي أول ما شافته قامت وقفت وشهقت وهي بتعيط: “أحمد..”
أحمد بص لها نظرة طويلة، نظرة ودع فيها كل الحاجات الحلوة اللي كانت بينهم، وقال بصوت هادي ومجروح:
