التكييف حكايات روماني مكرم 2
* في إيه هنا؟! إيه الفوضى دي؟ مين الناس دول ويا عبير إيه التهريج ده في مكان العمل؟!
محمود اندفع للأستاذ سامح وحط إيده على صدره يتكلم بمسكنة وخبث:
* يا فندم أنا جوزها.. الأستاذة عبير الموظفة الملتزمة عندكم، حابسة حاجتي ورافعة عليا قضايا تزوير وسرقة وبتمارس عليا بلطجة هي وأهلها! وجاية شغلك تتدارى فيكم وأنا جاي أطالب بحقي وبمرتبها اللي بتاخده وما بتدفعش منه مليم في بيتي!
حماتي كملت وراه ببراعة:
* أيوة يا بيّ! دي بتيجي هنا الشغل تسيب بيتها خراب وتيجي تأكل وتشرّب على قفا جوزها، وخدت أجهزة البيت كلها وهربت! شركة محترمة زي دي إزاي تشغّل عندها واحدة بالقسوة والافترى ده؟
الأستاذ سامح بص لمحمود ولأمه بنظرة احتقار قاطعة، ولّف لي وقال بجمود:
* عبير.. اتفضلي على مكتبي حالاً. وأنتوا اتفضلوا ادخلوا معها عشان المهزلة دي تنتهي هنا.
دخلنا المكتب، والأستاذ سامح قفل الباب وقعد ورا مكتبه، وبص لمحمود وقال بلهجة ثقيلة:
* الأستاذ بيقول إن عبير خدت حاجته وهربت ورامياك؟ ممتاز.. عبير شغالة معانا هنا من أربع سنين، وكل القرارات المادية وفواتير الشراء والتقسيط بتم من خلال الشركة بخصم مباشر من مرتبها. الميكرويف والأجهزة اللي بتتكلموا عنها، عبير قسطتها من مرتبها الخاص ومعانا الفواتير هنا في شؤون العاملين باسمها وبإمضائها!
محمود اتلخبط ووشها جاب ألوان، وقال يتلعثم:
* يا فندم.. بس هي مراتي والفلوس دي حق بيتي..
الأستاذ سامح قطعه فوراً وضرب بيده على المكتب:
* مرتب الموظف حقه الشخصي بالقانون يا محترم! أنت جاي هنا تقتحم شركة محترمة وتشهر بفرع كامل وبموظفة ممتازة عندنا عشان خلافات أسرية على ميكرويف وتكييف؟ أنت عارف إن الحركة دي ممكن أعملك بيها محضر رد شرف وتعدي على المنشأة وتشهير بموظفة في مكان عملها؟
حماتي كانت فاكرة إن المدير هيطردني أو يبهدلني قدامهم، بس لما لقيت الكلام انقلب عليهم، وقفت وزعقت:
* أنت بتدافع عنها ليه يا أستاذ؟! هي ساحراكم هنا ولا إيه؟ ابني راجل وست سيدها!
الأستاذ سامح رفع سماعة التليفون وبص للأمن اللي واقف على الباب:
* يا أمن.. خدو الأستاذ والست دي بره المبنى فوراً. ولو رجلهم عتبت الشركة تاني اتصلوا بالنجدة فوراً بتهمة اقتحام منشأة والتعدي على الموظفين!
رجال الأمن مسكوا محمود وأمه من دراعهم وسحبوهم لبره وهو بيحاول يتملص ويقول: “أنا صاحب حق! أنا صاحب حق!” وأمه بتصرخ وبتدعي عليا وعلى الشركة وهي نازلة على السلم.
