جالي ميراث حكايات رشا خالد ١
ودينا قالت بنعومة وهي متسندة على خطيبها:
“بلاش تتعبي نفسك يا ندى… لو محتاجة فلوس قولي لكريم. عيلة الشناوي عمرها ما هتسيب حد من أهلها محتاج.”
شدّيت كوباية الميه بقوة…
لحد ما مفاصل صوابعي بقت بيضا.
وبكل هدوء قلت:
“مش شقق… شوية أصول ولسه بيتم تقييمها.”
حماتي سألت وهي مهتمة:
“يعني كام؟”
ابتسمت.
ورقم 100 مليون جنيه لف على لساني…
لكنني بلعته.
ولم أنطق بحرف واحد……..
في اللحظة اللي التزمت فيها الصمت، حسيت بنظراتهم كلها معلقة على وشي، كأنهم مستنيين مني أرقام هزيلة يتسلوا بيها بقية السهرة. حماتي مسكت كباية الشاي تاني، وحركت المعلقة ببطء شديد صوته كان بيرن في الصالون كله، وقالت بنبرة مليانة استعلاء:
“ساكتة ليه يا ندى؟ شكلهم طلعوا كام ألف جنيه ومكسوفة تقولي! على العموم كتر خيرها… أهو ينفعوكي في أي حاجة شخصية بدل ما كل شوية تطلبي من كريم.”
كريم وقتها رفع رأسه من الموبايل لأول مرة من ساعة ما دخلت. بصلي بنظرة خالية من أي إحساس، وقال ببرود:
“خلاص يا أمي، كبروا الموضوع ليه؟ ندى أصلًا مابتفهمش في أمور الأصول والمعاملات دي، أيا كان المبلغ أكيد حاجة بسيطة.”
في الدقيقة دي بالذات، حسيت إن البرد اللي كان محاصرني بره دخل جوة قلبي واستقر. الراجل اللي كان نايم جنبي من بضع ساعات، وبيطلب مني أبعت بدله للدراي كلين، وبيتعامل معايا على إني ملكه وحقه المكتسب… هو نفسه اللي مضا على ورقة طلاقي من 68 يوم بتوكيل، وسابني عايشة في وهم كبير علشان يضمن إن وجودي في حياته يستمر بالشكل اللي يريحه، أو يغطي على حاجة تانية أنا لسه ما اكتشفتهاش.
مسكت كاس الميه اللي قدامي، شربت بق صغير، وبصيت لدينا اللي كانت باصة لساعتها بتفاخر وقالت:
“على العموم يا ندى، لو الفلوس دي عملت معاكي مبلغ معقول يعني… ممكن تجيبلي بيهم هدية الترقية بتاعتي، هههههه أصل البروش اللي إديتيهولي العيد اللي فات كان ذوقه قديم أوي، أديته للشغالة في البيت عندنا!”
الكلام كان زي طعنة في ضهري. البروش اللي اشتريته بدم قلبي وبكل تحويشة العمر اللي سابتها أمي الممرضة اللي قضت حياتها في الخدمة… ترميه للشغالة!
كلهم كانوا مستنيين إني أعيط، أو أتحرج، أو أستأذن وأدخل الحمام أداري دموعي زي ما عملت عشرات المرات في الست سنين اللي فاتوا. لكن المرة دي، الضحكة المكتومة اللي بدأت في مكتب الشهر العقاري رجعت تاني تظهر على أطراف شفايفي.
