جوز بنتي رماها حكايات انجي الخطيب ٢
»كاريمان قعدت تعيط وتلطم على وشها في زاوية الصالون: «والله العظيم ما أعرف! هو قالي إنه مطلق بقاله سنة، وقالي إن كل التصاميم اللي دخل بيها المناقصات بتاعته هو! ده نصاب وحرامي، خرجوني من هنا والنبي!»فريد وشه اتحول لكتلة من الغضب الأسود، نزل لمستوى مدحت ومسكه من ياقة قميصه بقرف: «إنت؟! إنت التصاميم والمخططات اللي كنت بتبهرني بيها مش بتاعتك؟! بتسرق مجهود مراتك؟! وبتمد إيدك على ست وتكسر عضمها وترميها في الشارع؟!
ده أنا مش بس هفصلك، أنا هرفع عليك قضايا احتيال ونصب وسرقة ملكية فكرية هتقعد فيها في السجن بقية عمرك، والشرط الجزائي في عقدك لوحده عشرين مليون جنيه، هجيبك على الحديدة ومش هسيبلك حتى الهدوم اللي في ضهرك!»مدحت انهار تماماً، عيونه احمرت من الدموع وبدأ يزحف على الأرض بجسمه المكلبش باتجاه رجلي: «أبوس رجلك يا حماتي.. أبوس جزمتك يا سيادة اللواء! سامحيني، الشيطان عماني، أمي هي اللي وزتني، قالتلي مريم مش من مستوانا بعد ما كبرت وبقيت مدير كبير، قالتلي نخلص منها عشان ناخد كاريمان بنت المليونير!
ارحميني عشان خاطر مريم.. مريم طيبة وبتحبني ومترضاش بحبسي!»بصيت له بقرف لا يوصف، وبعدت خطوة لورا عشان جزمته متلمسش هدومي، وقلت له: «مريم كانت طيبة لما كانت فاكراك راجل.. لكن إنت وأمك طلعتوا مجرد مسوخ. ومريم في مستشفى الشرطة بين الحياة والموت، وأنا اللي هحاسبك مش هي.»في اللحظة دي، دخل ضابط التحقيقات الجنائية شايل في إيده أكياس بلاستيكية شفافة محكمة الغلق: «تمام يا فندم!
لقينا السلاح المستخدم في الاعتداء، فازة كريستال تقيلة عليها آثار دماء متطابقة مع دماء الضحية، ولقينا في صندوق الزبالة الخارجي هدوم ملوثة بالدم كان الجناة بيحاولوا يحرقوها، بالإضافة للأجهزة والكاميرات اللي متثبتة على أسوار الفيلا؛ تم التحفظ على الهارد ديسك بالكامل وفيه توثيق للحظة سحل المجني عليها ورميها في شنطة عربية المتهم الساعة 4:30 الفجر!»سهير سمعت كلمة “الكاميرات” ووقعت مغمى عليها على الأرض، والشرطة سندتها بكلبشاتها. التفتت لتامر، رئيس المباحث، وبصوت الآمر الناهي اللي لا يقبل الجدل: «تامر.. المتهمين الاتنين يتحرزوا فوراً، ويتحولوا لنيابة أمن الدولة والنيابة الكلية برمسيس.
