خطيبتي القديمة أماني السيد ٣
سكتت لحظة، وبعدين كملت:
\- إنت كنت فاكر إن كل بوست بنزله عشانك، وكل مرة أدخل صفحتك وأشوف صورك مع مروة وأخرج، يبقى أنا لسه مستنياك. بس عمرك ما فكرت إن ممكن أكون بتوجع فعلًا، وإن الوجع ده في يوم يتحول لقرار إني أبعد عنك نهائي.
حاولت أقاطعها، لكنها رفعت إيدها تمنعني.
\- استنى، خليني أكمل. إنت كنت بتتعمد توجعني يا أحمد، وكنت مستني مني أجيلك وأعتذر وأقولك إني موافقة على كل شروطك، مع إنك عمرك ما سألت نفسك أنا ليه رفضت الشروط دي من البداية. كنت عايزني أرجعلك مكسورة، مش عايزني أرجعلك وأنا مقتنعة إننا نقدر نكمل.
حسيت بكلامها بيخترق كل حتة جوايا، لكني كنت لسه متمسك بالأمل اللي جاي عشانه.
قلت بصوت أوطى:
\- أنا غلطت، عارف إني غلطت. بس أنا مكنتش متخيل إنك هتخرجي من حياتي فعلًا. كنت فاكر إنك هتفضلي موجودة، وإن مهما عملت هتفضلي بتحبيني.
بصتلي طويلًا، وبعدين سألتني:
\- وإنت؟ بتحبني يا أحمد؟
السؤال اللي كنت مستنيه من شهور، واللي كنت أتمنى تسألهولي في أي لحظة، خلاني أتردد ثواني. مش عشان مش عارف إجابته، لكن عشان أول مرة أحس إن الإجابة ممكن متفرقش معاها.
قلت أخيرًا:
\- أيوه، بحبك يا منال. والله بحبك، ومش قادر أتقبل فكرة إنك تكوني لواحد غيري. أنا اتخطبت لمروة عشان أغيظك، وكنت كل مرة بجيب لها هدية أو أنزل صورة لينا، ببقى مستني أشوف رد فعلك. حتى لما جيت المحل بتاعك، كنت عايزك تغيري وتزعلي وتحسي إنك خسرتيني. بس لما عرفت إنك اتخطبتي، اكتشفت إني مش قادر أشوفك مع حد تاني.
خلصت كلامي وأنا مستني منها أي رد، حتى لو عتاب أو دموع، لكن منال فضلت ساكتة، وبعدها نزلت عينيها للدبلة اللي في إيدها وابتسمت.
ابتسامة صغيرة، هادية، مفيهاش أي وجع.
وبعدين رفعت عينيها ليا وقالت:
\- كنت أتمنى أسمع الكلام ده منك من زمان، يا أحمد.
قلبي دق بسرعة، وحسيت إن لسه فيه فرصة.
لكنها كملت:
\- كنت أتمنى أسمعه قبل ما تقرر تعاقبني على إني رفضت طلباتك، وقبل ما تدخل بنت تانية في حياتك عشان تستخدمها في وجعي، وقبل ما تخليني أحس إن مشاعري بالنسبة لك مجرد وسيلة تثبت بيها إنك مرغوب.
قربت منها خطوة وقلت:
\- طيب ما إحنا لسه نقدر نصلح كل ده. أنا ممكن أسيب مروة، وأجيلك من جديد، ونعمل كل حاجة بالطريقة اللي إنتِ عايزاها. أنا مستعد أغير أي حاجة، بس اديني فرصة.
