حماتي طلبت مني اساعدها أماني السيد 1
أما “سعاد” مرات خال جوزي، فعملت فيها الخبيرة وقالت وهي بتشاور ع السفرة اللي أنا هدّيت حيلي فيها:
“وبعدين يا مريم، الأكل تقيل قوي، السمنة عايمة على وش الصواني.. باين عليكي كنتِ بتطبخي وأنتي جعانة فإيدك فرطت في السمنة، اقعدي اشربي الشاي السادة وريحي معدتك، وإحنا هنقوم بالواجب هنا، كفاية عليكي وقفة المطبخ.”
حمـ . ـاتي كانت قاعدة زي الملكة، بتبصلي بنظرة كلها شمـ . ـاتة وهي بتقطع حتة حمام وبتقولي ببرود يفرس:
“شوفتي يا مريم؟ الكل أجمع إنك محتاجة وقفة مع نفسك.. يلا يا حبيبتي اطلعي كلي ساندوتش الجبنة بتاعك فوق في هدوء، وإحنا هنا هنكمل العزومة، ولو عوزنا حاجة تانية هبقى أرن عليكي تنزلي تجبيها.”
في اللحظة دي، حسيت إن الدنيا بتلف بيا.. السجاد اللي غسلته، والحيطان اللي زعفتها، والأكل اللي ريحته ملية البيت وأنا دايخة من الجوع.. كل ده اتمحى بكلمة “تخينة”. بصيت لهم كلهم ودموعي كانت محبوسة بالعافية، وكنت بسأل نفسي: “هو أنا عملت في نفسي كدة ليه؟”.
لفيت ضهري ومشيت.. خطوة ورا خطوة وأنا مش شايفة قدامي من كتر الدموع اللي كانت محبوسة في عيني، وطلعت شقتي وسندت ضهري على الباب واتهبدت على الأرض. كنت حاسة بنـ .ـار بتاكل في صدري، نـ .ـار القهر والظلـ .ـم. تعب يومين كاملين، وصحتي اللي اتهدت في غسيل وتزعيف وطبيخ، كله اتردلي بإهانة وكسرة نفس قدام الغريب والقريب، ومن مين؟ من الناس اللي كلت لقمتي اللي طالعة من عرق جبيني وصحتي.
قعدت في الأرض أعيط بحرقة، وكل كلمة قالوها كانت بتتعاد في ودني زي الكرباج. “الجبنة القريش.. الديفوهات.. وشك مفرش.. اطلعي كلي فوق”. افتكرت شكل حمـ . ـاتي وهي قاعدة زي الملكة وبتبصلي بشمـ . ـاتة، وافتكرت نظرات بناتها وخالاتهم.. ومفيش واحد فيهم فكر يقولي شكراً، ولا تسلم إيدك.
في وسط كسرتي دي، الباب اتفتح، ودخل جوزي “طارق” وهو لسه مأنتخ ولابس ترينج البيت، بيبصلي باستغراب وهو بيفرك في عينه وقال:
ـ إيه ده يا مريم؟ أنتي قاعدة في الأرض كدة ليه وبتعيطي؟ والناس تحت صوتهم عالي وشغالين أكل.. أنتي مكنتيش معاهم ولا إيه؟
بصيتله وأنا مش قادرة أستوعب بروده، قمت وقفت ودموعي مغرقة وشي وقلت بصوت مخنوق:
ـ طارق.. أمك وأهلها هانوني وكسروا نفسي قدام الكل، طردوني من على السفرة عشان “تخينة” وعشان “الأكل دسم ومينفعش للي زيي”، بعد ما اتهد حيلي في غسيل السجاجيد والحيطان والمحاشي والبط اللي هما بينهشوا فيه دلوقتي!
