بعد ولادتي روماني مكرم 3

الحاجة صفية لوحت بإيدها وقالت بكبرياء زايف:

“يجمدوا إيه ويقفلوا إيه؟! روح لأي محامي كبير واديله قرشين يخلص لك الحوار ده.. دول ناس جربوعين، وأبوها صاوي حتة أرزقي، والواد اللي كلمك ده تلاقيه بيعمل لقطة عشان يخوفك!”

معتز صرخ في أمه لأول مرة في حياته وقال بعصبية:

“لقطة إيه يا أمه؟! ده طارق الصاوي! الحوت اللي ماسك مقاولات واستثمارات نص البلد! ده بكلمة منه يرميني ورا الشمس.. الوصل اللي كنت مهدد بيه أبوها، المحامي بتاعه قدم فيه بلاغ رسمي للنائب العام بإن التوقيع مزور وتحت الابتزاز، والشرطة دلوقتي بتدور عليا عشان أمر ضبط وإحضار!”

في نفس اللحظة، في بيت أبويا الحاج الصاوي.. الأجواء كانت مختلفة تماماً.

كنت قاعدة في الصالة، شربت مغات دافي عملتهولي أمي، والبيبي كان نايم في حضني ومطمن. طارق ابن عمي كان قاعد على الكرسي، بيبص في تليفونه الشيك وبيهز راسه برضا، وأبويا قاعد جمبه وعينه مليانة فخر.

طارق قفل التليفون وبص لأبويا وقال بابتسامة نصر:

“عمي الصاوي.. الباشا معتز دلوقتي بيلف حوالين نفسه زي الديك المذبوح. شغله وقف، صفحته اللي بيكسب منها اتقفلت، والأمر بالقبض عليه صدر.. دلوقتي هو وعيلته عرفوا إن الله حق، وإن فلوسهم متسواش تمن الحبر اللي داسوا بيه على كرامة بنتك.”

أبويا تنهد تنهيدة طويلة طلعت من نغاشيش قلبه، وقال:

“الحمد لله يا ابني، ربنا سخرك لينا عشان تنصر الغلبان.. أنا مش عاوز أئذيه يا طارق، أنا كل اللي عاوزه حق بنتي وكرامتها، والواد يتربى في حضن أمه معزز مكرم.”

طارق رد بحسم: “حقها هيجي تالت ومتلت يا عمي، وصابرين هتاخد كل مليم وكل ورقة تخصها وهي قاعدة حاطة رجل على رجل.. والندل ده مش هسيبه غير وهو جاي لحد هنا، يوطي على إيدك ويبوسها عشان تسامحه.”

وفجأة.. تليفون طارق رن.

بص على الشاشة ولقى رقم معتز.. طارق فتح الخط وفتح الإسباكر من غير ما يتكلم.

جه صوت معتز من الناحية التانية، بس المرة دي مكنش صوت الباشا المغرور اللي راكب الكيا سبورتيدج.. كان صوت واحد مكسور، صوته بيريّق من الخوف، وقال بنبرة ذليلة:

“طارق بيه.. أنا أسف.. حقك عليا وعلى راسي، أنا مكنتش أعرف إن صابرين تخصك.. أنا مستعد لأي حاجة تطلبها، بس ابوس إيدك ارفع الحجز وفك البلاغات، أنا بيتي بيتخرب وبموت في الدقيقة مية مرة!”