أنا لسة متجوزة حكايات روماني مكرم 1

“كرامة أمي على رأسي من فوق، بس الحق أحق أن يتبع! مراتي ما طلبتش لبن العصفور، طلبت هدوم واسعة تقعد بيها في بيتها وعشان تخرج بيها ومتمشيش مزنوقة ومقهورة. والفلوس اللي هتتجاب بيها الهدوم دي فلوسي وعرقي، مش باخد من حد حاجة. وزي ما جبت أوضة الأطفال بفلوسي، هجيب هدوم مراتي وهدوم ابني بفلوسي، ومحدش له دعوة ببيتي وحياتي!”

حماتي قعدت على الكنبة وهي بتتنفس بسرعة وتعمل نفسها تعبانة:

“ماشي يا مصطفى.. بقى كدة؟ بتكسر كلامي وتهين أمك عشان خاطر هدوم؟ روح يا ابن بطني، روح هات لها اللي هي عاوزاه، بس اعرف إنك كدة بتبدأ حياتك بمعصية أمك والتفريط في أصولك.”

سحر ابتسمت بذكاء وقالت بصوت هادي:

“ربنا ما يجيب معصية يا طنط، ده رضى ربنا في الأصول والعدل. والراجل اللي يصون بيته ومراته ربنا بيبارك له في رزقه وفي صحته. يلا يا مصطفى، خد مراتك وانزلوا انقوا كلمتين حلوين وافرحوا باللي في بطنها، وبلاش النكد ده يقت*لها ويأثر على البيبي.”

مصطفى مسك أيدي وقومني بالراحة، وبص في عيني وقاللي: “قومي يا حبيبتي ياللا نلبس وننزل، وما تزعليش نفسك أبداً، كل اللي أنتِ عاوزاه هييجي ولحد عندك.”

مشيت معاه وأنا حاسة إن ظهري اتسند بعد ما كان مكسور، بس عيني جت في عين حماتي وأخته قبل ما أخرج من باب الصالة، وشفت في عيونهم شرارة نار ما بتنطفيش، وحسيت إن الجلسة دي ما كانتش النهاية.. دي كانت مجرد بداية لحرب طويلة هتفتح أبوابها في البيت ده.