أنا لسة متجوزة حكايات روماني مكرم 1

ندى وشها جاب ألوان، واتقطعت منها الأنفاس، وبصت لأمها تلحقها. حماتي قامت وقفت ونفضت جلابيتها بكل غضب، وصوتها جهور في الصالة:

“جرى إيه يا سحر؟! أنتِ هتجي كمان تفتحي بقك في بيتي وفي حقي؟ أنتِ نسيتي نفسك ولا إيه؟ البنت بتطلب فلوس من ابني طالعة نازلة، واليومين دول الحمل طالع في دماغها وعاوزة هدوم ومصاريف، ومصطفى شقيان وطالع عين أبه، مش كفاية جاب أوضة أطفال بكل مصاريفها؟ يبقى أهلها يشيلوا شيلتهم ويكملوا جهازها، ده العرف واللي نعرفه في الأصول!”

سحر ضحكت بصوت عالٍ ومستفز، وقعدت على الكنبة وحطت رجل على رجل، وبصت لمصطفى اللي كان واقف زي التائه ومش عارف يدافع عن مين ولا يرد على مين، وقالت:

“عرف مين يا طنط اللي بتتكلمي عنه؟ هو من متى العروسة وهي بتجهز بتجيب هدوم للحمل وهدوم للبيبي في كرتونتها؟ هي كانت ساحرة وعارفة هي هتحمل في ولد ولا بنت؟ ولا كانت عارفة هتحمل في الصيف ولا في الشتاء عشان تجيب المقاس والفضفضة المناسبة؟ العرف اللي بتقولي عليه ده ما أنزل الله به من سلطان، ده افتراء وافتكاسات عشان تطلعوا العروسة مقصرة وتوفروا على ابنكم المصاريف!”

التفتت سحر لمصطفى ومسكت أيديه بالراحة وقالتله بكلام يقطع الشك باليقين:

“يا مصطفى، أنت راجل ومسؤول. الراجل لما يتجوز بيكفل مراته بكل حاجة، من اللقمة اللي بتاكلها للهدوم اللي بتسترها. مراتك شايلة ابنك في بطنها، هرموناتها متلخبطة وجسمها بيتغير كل يوم، وده أصل خلق ربنا. هل يعقل تروح لأبوها تقول له هاتلي فلوس هدوم عشان ابنك اللي في بطني كبر وجسمي اتغير؟ أنت تقبل على نفسك كرجولة إن نسيبك هو اللي يصرف على مراتك وهي في ذمتك؟”

الكلام نزل على مصطفى زي المية الباردة صحاه من غفلته. بص لأمه وبص لأخته، وبعدين بصلي وأنا ساكتة والدمعة خلاص نزلت من عيني على خدي. مصطفى حس بالكسرة اللي في عيني، وحس إن كرامته كراجل بتمس. أمه لاحظت التغير في وش ابنها، فصحت فيها روح السيطرة وقالت بصوت أعلى:

“انت هتاخد كلام سحر يا مصطفى؟ سحر عاوزة تخرب عليك وتسوس مخك! نسيت لما اختك ندى اتجهزت احنا شيلنا ايه وأهل جوزها شالوا ايه؟ البنت بتيجي بكرامتها وجهازها كامل، وهدوم الحمل والبيبي نصها على أهل العروسة، ده واجبهم عشان ينستروا قدام الناس! عاوز مراتك تحط رأسك في الطين وتخلي الناس تقول عليك ماسك أيدك وأهلها هما اللي يصرفوا؟”