سلفتي حكايات روماني مكرم 1

— “أيوة يا هدى.. أنتِ فين يا أختي؟ أنتِ مشيتِ بجد ولا إيه؟ افتكرتك نازلة تجبي حاجة وجاية!”

هدى (بضحكة خفيفة):

— “أروح أفسح نسرين وأجيب حاجة؟ لا يا فريدة، احنا أجرنا شقة سوبر لوكس على البحر مباشرة، فيها تكييفات ومطبخ أمريكاني ونظافة، وقاعدين في البلكونة بنشرب شاي بالنعناع وبنتفرج على الغروب.”

فريدة (بصوت اتغير وحسد باين):

— “أجرتوا شقة؟! ومنين يا حسرة؟ هو تامر لحق يبعت لكم فلوس؟ وكمان على البحر؟!”

هدى:

— “الحمد لله.. تامر ابني راجل، ما يرضاش أمه ومراته يتهانوا ولا يشتغلوا خدامين عند حد. بعت لنا المبلغ اللي يكفينا وزيادة، وقالي اتفسحوا وكلوا جاهز ومتقفوش في مطبخ.”

فريدة (سكتت ثانية وبعدين قالت بنبرة ارتباك وتراجع):

— “طب.. طب ما تيجوا يا هدى تقعدوا معانا طيب؟ أصل البوتجاز عندي اتسد ومش عارفين نطبخ، وعيال أختي كسروا الخلاط، وأمي تعبانة ومش قادرة تقف تعمل أكل، وأختي سحر ما بتعرفش تولع عين البوتجاز.. تعالوا الشقة واسعة ونتلم مع بعض ونشارك الشقة!”

بصيت لنسرين، لقينا بنضحك بصوت واطي على الاستغلال اللي في دمها.

هدى (برزانة وقوة):

— “لا يا فريدة، اللي يقعد في شقتك يمشي بقوانينك.. وأنا ونسرين قوانيننا الراحة والاستجمام، مش الخدمة في الشقق المفتوحة. خلي أختك وحماتها وعيال أخوكي ينفعوكي ويعملوا الأكل ويكنسوا الرملة. احنا طالعين نجيب أكل جاهز من مطعم الأسماك دلوقتي ونازلين البحر تاني.”

فريدة (بغل مكتوم):

— “أها.. بقى كده يا هدى؟ تبيعيني عشان شوية الفلوس اللي ابنك بعتهم؟ ولسه ليا كلام تاني مع أخوكي لما نرجع القاهرة!”

هدى:

— “أعلى ما في خيلك اركبيه يا فريدة.. وسلام عشان الأكل السخن وصل.”

قفلت الخط في وشها، وحسيت بنصر وفرحة مش طبيعية. نسرين مسكت إيدي وقالت لي:

— “الله يخليكي لينا يا طنط.. والله أنتِ جيبتي لي حقي وحقك بحكمة وأدب.”

قضينا باقي اليوم في الشارع، دخلنا مطعم أسماك معروف، طلبنا جمبري ومشوي وسمك دنار وشوربة سي فود، أكلنا لما شبعنا، وقضينا السهرة بنتمشى على الكورنيش ونشتروا تسالي وهدايا لتامر والبيت.

عدت الأيام، يوم ورا يوم.. كل يوم ننام ونصحى براحتنا، ننزل البحر، ناكل أكل نضيف جاهز من الشارع، نتفرج على الأفلام في الشقة بالتكييف، وفريدة أهلها مقضينها خناقات وتعب ونكد في شقتها بسبب الأكل والغسيل، وكل شوية يوصلني أخبار من قرايبنا إن فريدة بتعيط ومتدبسة في خدمة عيلتها ومفيش حد بيساعدها، والتكيف عندها عطل والأكل باخ!