جارتي صيدلانية حكاوي شيمو ١

أنا وجوزي بصينا لبعض، وقلنا في نفس واحد: «ستة آلاف وتلتمية جنيه؟! إزاي يعني؟!»
قالت: «آه طبعًا! أنا حسبت كل حاجة، الحقن كل يوم، وقياس الضغط، وقياس السكر، وشرائط السكر اللي كنت بجيبها من جيبي. إنتوا فاكرين العلاج ده ببلاش؟!»
جوزي قالها: «يا أستاذة، إحنا مقدرين تعبك، بس إنتِ ماقولتيش من الأول إن فيه حساب، ولا اتفقنا على أسعار، ولو كنتِ قولتي كنا اتصرفنا.»
صرخت وقالت: «يعني إيه؟! عشان ماطلبتش فلوس من الأول يبقى حقي يضيع؟! ده إنتوا ناس بتاكلوا حق الناس!»
أنا حسيت إن كرامتي اتجرحت، وقلت لها: «يا حبيبتي، والله ما أكلنا حقك ولا حاجة، بس إنتِ كنتِ بتقوليلي إني أختك، وكنتِ بتيجي تساعديني من غير ما تفتحي سيرة فلوس. وبعدين أنا عمري ما قصرت معاكي، وكل ما أعمل أكل كنت ببعتلك، ولو كنتِ طلبتي مني فلوس كنت هديتهالك على قد ما أقدر.»

ردت عليّا بكلام وجعني: «هو أنا جاية أشتغل عندك عشان تبعتيلي صينية مكرونة بالبشاميل؟! الأكل اللي بتبعتيه ده المفروض ببلاش بين الجيران! أنا عايزة فلوسي!»
جوزي قالها: «بصي، إحنا مش بنقول إن تعبك ملوش قيمة، لكن المبلغ ده كبير، وإنتِ اللي حددتيه من نفسك بعد ما خلصت المدة كلها. كان لازم نتفق من الأول.»
وفجأة، بدأت تحسب قدامنا: «الحقن بعشرين جنيه في اليوم، والضغط بعشرين، والسكر بعشرين، غير الشرائط، وغير المشاوير!»
قلت لها: «طب ما إنتِ كنتِ جاية في طريق شغلك، وكنتِ بتقوليلي إنك مش عايزة مني حاجة!»
قامت زعقت وقالت: «أنا مش مسامحاكم! وربنا ما يباركلكم في فلوسكم، وربنا ياخد حقي منكم، حتى اللي في بطنك مش مسامحة فيه!»
أول ما سمعت الدعوة على الجنين اللي لسه في بطني، عيني دمعت، وحطيت إيدي على بطني وقلت لها: «حرام عليكي! أنا ما أذيتكيش، ولا قلتلك مش هدفعلك أي حاجة، أنا كل اللي بقوله إنك ما اتفقتيش معايا من الأول!»
لكنها خرجت من البيت وهي بتدعي علينا، وبعدها بدأت تحكي للجيران إننا ناس معفنين وبناكل حقوق الناس، وإنها خدمتني تلات شهور وإحنا رفضنا نديها حقها.
والله يا بنات، بقيت أخاف أنزل أشتري حاجة من تحت البيت، وكل ما أقابل واحدة تبصلي بنظرة غريبة، لحد ما واحدة من الجيران وقفتني وقالتلي: «إنتِ إزاي تعملي كده في الست الغلبانة دي؟ دي بتقول إنك خليتيها تصرف عليكي من جيبها، ولما طالبتك بحقها