مرات صاحب جوزي بقلم أماني السيد 3

ـ “ست هناء.. أنا خلصت رص الخشب بتاع طلبية بكرة، في أي أوامر ثانية؟”

هناء رفعت عينها من الدفتر، بصت له بنظرة هادية خالِية من أي انتقام أو غضب.. نظرة ست تعافت تمامًا من وجعها، وما بقاش في قلبها لمحمود غير الإشفاق والحياد.

طلعت من الشنطة أظرف بيضاء وحطتها على الترابيزة:

ـ “اقعد يا محمود.”

محمود اتفاجئ، قعد على طرف الكرسي بالراحة وهو حاطط إيديه في حجريه زي العيل الصغير:

ـ “خير يا ست هناء؟”

هناء زقت الأظرف ناحيته وقالت بصوت ثابت:

ـ “الظرف الأولاني ده فيه مخالصة كاملة من الحاج عبد الصمد والتجار.. ديونك كلها اتسددت بالكامل، ومحدش ليه عندك مليم واحد أو كمبيالة. والظرف الثاني فيه إيصال سداد نفقة الولاد عن الست شهور اللي فاتوا.”

محمود بص للورق والدموع اتجمعت في عينيه:

ـ “والظرف الثالث؟”

هناء مسكت الظرف الثالث، وطلعت منه ورقة رسمية وقدمتها له:

ـ “ده ورقة طلاقي منك يا محمود.. الطلاق تم رسمياً وبحكم محكمة، والأوراق اتوثقت.”

محمود حاس بصدمة، رغم إنه كان عارف إن اللحظة دي جاية لا محالة، بس لما شاف الورقة مكتوب فيها اسم “هناء” ومطلقة منه، دموعه نزلت على خدوده وبكى بصوت مكتوم:

ـ “طلقتيني يا هناء؟ خلاص؟ مفيش أمل ترجعيلي؟ أنا اتغيرت والله.. أنا اتعلمت الدرس وقُ/تلت ألف مرة في اليوم وأنا بشوفك بعيدة عني وبخدم تحت إيدك!”

هناء هزت رأسها بالرفض القاطع وابتسمت ابتسامة رضا:

ـ “أنا ما طلقتكش عشان أنتقم منك يا محمود.. أنا طلقتك عشان أبدأ حياتي بجد. الانتقام كان حقي في الفلوس والكرامة وأخدته، إنما الرجوع؟ الرجوع لواحد هان عليه بيته وشقا مراته وباعها عشان شهوة ودلع كداب، يبقى غباء.. وأنا خلاص، فترة غبائي انتهت من يوم ما بعتلي الصور من إسكندرية.”

محمود مسح دموعه بظهر إيده وقال بصوت مرتعش:

ـ “طب والولاد؟ هشوفهم؟”

هناء قالت بحنان الأم الأصيلة:

ـ “الولاد عيالك يا محمود.. زياد وليلى يقدروا يشوفوك في أي وقت، ومحدش هيحرمك منهم ولا هيحكي لهم عن نذالتك، أنا مربياهم على الاحترام. بس شرطي الوحيد.. تنزل تشوفهم بضرعك وشقاك ونضافتك، مش بضعفك وكسرتك.”

كملت هناء كلامها وهي بتقوم تقف:

ـ “أنا أخدت نصيبي القانوني في الورشة بالشراكة مع سعاد والحاج عبد الصمد، وأنت من بكرة تقدر تفضل شغال هنا كصنايعي براتب محترم يعيشك مستور، أو تاخد أوراقك وتدور على ورشة ثانية تبدأ فيها من جديد.. الاختيار ليك.”