مرات صاحب جوزي بقلم أماني السيد 3
محمود بلع ريقه بتعب.. يشتغل “صنايعي باليومية” في الورشة اللي كان طول عمره بيدخلها زي العمدة؟ يشتغل تحت أمرة وإدارة “هناء” الست اللي كان بيستخسر فيها الموبايل والطقم الجديد؟
لكن الحاجة والذل أكلوا كبريائه. هز رأسه بسرعة وقال:
ـ “موافق.. موافق يا حاج! قل لـ هناء إني موافق على أي شرط، بس سيبوني أكل عيش وأسدد اللي عليا!”
تاني يوم الصبح، الساعة تسعة.
الشارع كله كان متجمع قدام الورشة. الورشة كانت متنضفة، ومترتبة، وعلقت عليها يافطة جديدة مكتوب عليها: **(ورشة الأمل للنجارة والتديكور ـ إدارة مدام هناء عبد السلام ورثة المرحوم رفعت)**.
هناء كانت واقفة قدام الورشة، لابسة طقم نضيف وأنيق، ومسكة في إيدها دفتر الحسابات الجديد. الحاج عبد الصمد واقف جنبها، وسعاد واقفة بتوزع شربات على الجيران بمناسبة الافتتاح ورد الحقوق لأصحابها.
وفي ركن الورشة الداخلي، بعيد عن أعين الناس.. كان محمود واقف، لابس أفرول شغل قديم ومقطع، ماسك المكنسة وبيكنس تراب الخشب من على الأرض، وعرقه نازل على وشه.
هناء دخلت المكتب الصغير، قعدت على الكرسي اللي كان محمود بيقعد عليه ويتنطط ببرود. فتحت الدفتر، وندت بصوت واضح وثابت:
ـ “يا أسطى محمود!”
محمود ساب المكنسة من إيده بسرعة، وجري وقف قدام باب المكتب، نزل رأسه في الأرض وقال بصوت واطي ومكسور:
ـ “نعم يا ست هناء.. أؤمريني.”
هناء بصت له بجمود، حطت ورقة وقلم قدامه على الترابيزة وقالت:
ـ “يوميتك هنا 150 جنيه.. هيتخصم منها 100 جنيه يومياً لصالح نفقة زياد وليلى وسداد ديون التجار، وهيتفضل لك 50 جنيه تجيب بيها أكلك وشربك وتنام بيها في أوضة الخزين اللي ورا الورشة. والتزامك بالمواعيد هو اللي يحدد هتقعد هنا ولا تترفض وتروح السجن. مفهوم؟”
محمودغمض عينيه والألم بيقطع في صدره. الـ 50 جنيه اللي بقت يوميته، هي هي المبلغ اللي كان بيستخسره فيها لما تطلب منه مصاريف البيت!
رفع رأسه وبص لهناء.. حاول يدور في عينها على أي ذرة أمل، أي بقايا للست اللي كانت بتموت فيه وبتبارك على نكده، بس مالقاش غير جدار من الثلج الصلب.
قال بصوت مخنوق والدمعة محبوسة في عينه:
ـ “مفهوم يا ست هناء.. مفهوم.”
هناء قفلت الدفتر وقالت ببرود:
ـ “اتفضل على شغلك.. الخشب الجديد وصل ولازم يترص.”
