بنت مين اللي تيجي تقعد بيكِ حكايات نورهان العشري 2
قلت له بابتسامة ثلجية:
ـ لا.. دي قضية جديدة خالص.. اسمها “سقوط القناع”. افتحه واقرا يا جواد.
تمدت إيده بخفة وافتتح الملف، بس مع أول ورقة، وشه بدأ يتغير.. ألوانه اتخطفت! البسمة اللي كانت على وش اختفت تماماً، وعينيه بقت بتتحرك بين السطور بسرعة ورعب مش طبيعي. كانت دي أوراق التحويلات الماليّة، والأسماء المستعارة، وصور اجتماعاته مع قرايب نورهان في كافيهات متطرفة، بالإضافة لتسجيل المكالمة اللي نورهان كلمتني فيها وشركتها في التحويلات!
عرق بارد بدأ ينزل على جبهته، ورفع عينيه ليا وهو مش مصدق.. صوته طلع مكسور ومرعوب:
ـ إيه.. إيه دا يا ولاء؟ إنتِ جبتِ الحاجات دي منين؟! إنتِ بتراقبيني؟!
قمت وقفت، ومشيت خطوات هادية حوالين الكرسي بتاعه، وحطيت إيدي على كتفه وضغطت عليه بخفة وقريب من أذنه قلت بصوت واطي ومخيف:
ـ أنا مراقبتكش يا جواد.. إنت اللي بعتلي نورهان عشان تكسر كرامتي وتلعب معايا حرب نفسية.. نسيت إن اللي تلعب مع محامية لازم تكون أوراقها نظيفة؟ إنت لعبت في منطقة غلط خالص!
جواد وقف فجأة، ورزع الملف على الترابيزة وصوت طالع بالعافية من الرعب:
ـ إنتِ عايزة إيه يا ولاء؟ بتهدديني بضياع مستقبلي وحبسي؟ إنتِ نسيتِ إنك مراتي وأم ولادي؟!
ضحكت بصوت عالي، ضحكة رنت في البيت كله:
ـ مراتك؟ دلوقتي افتكرت إني مراتك وأم ولادك؟ لما كنت بتضربني وتهينني وتشوفني كرسي كنت ناسي؟ لما أمك قالتلي أحمدي ربنا إنه متجوزش عليكِ كنت ناسي؟ نورهان اللي بعتها لي تباركلي على الشقة، كانت فاكرة إنها هتهدني، بس هي بجهلها سلمتك ليا تسليم أهالي!
جواد مسك إيدي بلهفة ورعشة أول مرة أشوفها في حياتي، ووقع تقريبًا على ركبه وهو بيترجاني:
ـ ولاء.. أرجوكي.. الملف دا لو وصل للتفتيش أو النيابة العسكرية أنا هترفض وهتحبس.. أبويا هيطب ساكت وأمي هيجرالها حاجة.. أرجوكي يا ولاء بلاش دمار شامل! أنا أسف.. والله أسف على كل لحظة وجعتك فيها!
بصيت لإيده اللي ماسكة إيدي بقرف، وشدت إيدي منه بقوة وقلت له وأنا ببص له من فوق لتحت:
ـ الأسف دا تقوله لنفسك ولأُّمك اللي ربتك على الكبر والافتراء.. الملف دا مش هيخرج من إيدي بشرط واحد.. وبكره الصبح هتعرف شرطي الأخير إيه، قدام عمي وأمك والعيلة كلها.. تحضر نفسك يا حضرة الظابط، عشان بكرة حفل تجريدك من كل كبرياءك!
