ابني حكايات روماني مكرم 2
* “سامحيني يا سعاد… أنا اللي سبتكم وسافرت… أنا اللي سبت ابننا للغربة والناس تاكل في لحمه… أنا السبب في كل اللي حصل ده…”
حطيت إيدي على رأسه وقلتله بصوت حزين ومجهد:
* “المهم أحمد دلوقتي يا حمادة… المهم ابننا يقوم بالسلامة.”
دخلنا سوا بالرداء الطبي العازل لأوضة العناية. أحمد كان بدأ يفوق تدريجيًا من أثر البنج. فتح عينيه الصغيرتين ببطء شديد، وبص حواليه بتشتت، لحد ما وقعت عينيه عليا وعلى أبوه واقفين جنبه.
ابتسامة باهتة أوي اترسمت على وشه الأصفر، ومد إيده الصغيرة الضعيفة ناحية حمادة:
* “بابا؟ أنت جيت من السفر؟”
حمادة نزل على ركبه جنب السرير ومسك إيد أحمد وباسها ميت مرة وهو بيبكي:
* “جيت يا قلب بابا… جيت ومش هسيبك تاني أبدًا… مش هسيبك أبدًا يا أحمد.”
أحمد بصلي ودمعة نزلت من عينيه، وقالي بصوت واطي ومجهد:
* “يا ماما… أنا أسف إني كدبت عليكِ… خالو مصطفى قال لي السحر هيتفك لو سكتنا… بس رجلية لسه بتوجعني أوي…”
الكلمة نزلت عليا زي الصاعقة… “السحر”؟
بصيت لحمادة برعب، ورجعت بصيت لأحمد وقلتله بذهول:
* “سحر إيه يا أحمد؟ خالك قالك إيه بالظبط؟”
أحمد حرك رأسه بالراحة وقال بتلعثم وهو بيصارع النوم والبنج:
* “خالو قالي… إن الدودة دي مش من الورشة… قالي إن فيه حد عملنا سحر في البيت… وهو كان بيحاول يطلعه بالملقاط عشان… عشان يفك العمل اللي محطوط تحت سريري…”
الكون كله اتجمد تاني! الكلام اللي قاله أحمد غير مجرى القصة تماماً…
يعني موضوع ورشة الحرفيين والدبة المستوردة كان كدبة تانية غطى بيها مصطفى على الحقيقة؟ إيه السر الحقيقي المرعب اللي كان مستخبي تحت سرير أحمد؟ وليه مصطفى يدخّل فكرة “السحر والعمل” في رأس طفل عشان يبرر وجود طفيل قذر جوة جسمه؟
الحقيقة البشعة والسر اللي يهد العائلات… كان لسه مستنينا نكتشفه في البيت!
رجعت للبيت مع حمادة بعد ما حالة أحمد استقرت في العناية تحت الرعاية الطبية. كان الفجر بيبدأ يشق الضلمة، والشقة كانت ساحة حرب هادية… السكوت فيها يوجع أكتر من الصريخ.
دخلت أوضة أحمد وأنا ركبي بتخبط في بعضها، وحمادة ورايا ماسك كشاف الموبايل وشه شاحب زي الموتى. قربنا من السرير اللي نام عليه ابننا سنين وهو بيتألم في السر. حمادة وطي على الأرض ورفع المرتبة واللوح الخشبي بكل قوته، ووجّه الضوء للزاوية المظلمة تحت السرير.
