مراتي بقلم ضحى ٢
الخال والعمال واقفين يمسكوا بطونهم من الضحك عليا، وأنا إيدي أكلتني من المحاولات الفاشلة، لحد ما بعد ساعة كاملة من العذاب والتعفير بالطين ومحايلة الجاموسة، قدرت أطلع نص جردل لبن بالعافية، ودراعي بقى مش حاسس بيه تماماً وأعصابي اتدمرت.
رجعنا البيت وأنا ماشي بالعافية، جازز على أسناني ورجليا بتخبط في بعضها من التعب. لقيت الجدة مجهزة سفرة ريفية عريضة عليها فطير مشلتت وعسل ومرتة وجبنة قديمة.. قعدت أترمي على الكنبة وأنا مهدود.
حمايا قعد جنبي، طبطب على كتفي وقال:
– كده يا بني تبدأ تفهم.. السمنة دي مش حتة دهن بنشتريها وخلاص، دي نقطة عرق من كل واحد هنا.. عرفت بقى ليه زعلنا؟
هزيت رأسي بتعب وقلت:
– حرمت.. والله العظيم حرمت.. لو شفت حلة في البيت فيها مية حتى، مش هقرب منها ولا هغسلها غير لما أخد موافقة كتابية وموثقة من الشهر العقاري!
الجميع ضحكوا، ومراتي بصتلي بنظرة فيها شوية حنية ورضا، وقالتلي:
– خلاص يا سيدي.. حقك عليا تعبتك، بس كان لازم تعرف إن تعبي مكنش سهل.
تنفس الصعداء وقلت:
– الحمد لله إن الكابوس ده خلص.. يلا بينا بقى نلم السمنة والبرطمانات ونرجع القاهر…
قاطعتني الجدة وهي بتحط كاس الشاي بنعناع على الترابيزة وقالت بصوت هادي يقطع الخلفية:
– ترجعوا فين يا ابني؟! هو خالها ما قالكش؟ السمنة دي لازم تفضل بايته في الفخار ليلة كاملة تحت الندى عشان تعقد وتظبط.. وانتوا بايتين معانا هنا للصبح.. وبكرة الصبح بدري عندك مهمة ثانية قبل ما تتحركوا!
بصيت لمراتي بذهول وقلت بصوت واطي:
– مهمة إيه تاني يا نهار أسود؟! هو أنا داخل معتقل؟!
بصيت للجدة ورجعت بصيت لمراتي وأنا حاسس إن فيوزاتي خلاص هتضرب. “مهمة ثانية؟!” هي الحكاية ملهاش نهاية ولا إيه؟!
الجدة ابتسمت بتشفٍ وقالت:
– السمنة عشان تطلع مظبوطة ومفيهاش ريحة، لازم البرطمانات الفخار تتغسل بخل ومية دافية وتنشف في شمس الصبح، وبعدين تتصب السمنة وهي دافية بدرجة معينة.. وده شغلك بكرة من أذان الفجر!
ليلتها نمت على السرير النحاس القديم بتاع البيت الريفي، جسمي كله مكسر ومحلول.. دراعاتي بتوجعني من كتر تقليب السمنة وحلب الجاموسة، وظهر يأن من القعدة على الكرسي الواطي. كل ما أغمض عيني، ألمح الجاموسة بتبصلي بنظرة الانتقام، وأسمع صوت كبشة السمنة وهي بتقلب!
