أوراق طلاق أماني السيد
## الفصل الثاني: الستر لما يدوب
أول ما الشاشة اسودّت، القاعة الصغيرة اللي كنا قاعدين فيها في كافيه الزمالك اتملت بسكوت غريب… سكوت شبه سكرات الموت. حمايا الحاج عبد الفتاح، الراجل اللي كان صوته بيزلزل العمارة، لقيت كتافه فجأة نزلت، ونفسه بقى عالي ومكتوم، كأنه بلع موس حلاقة.
حماتي أم أحمد فضلت تبص لأبو جوزي ولأحمد برعب، وإيدها كانت بترتعش لدرجة إن الشنطة الجلد اللي في حضنها وقعت على الأرض، وطلعت منها علبة الدوا ومنديل قماش قديم. ومي، اللي كانت داخلة الكافيه وكأنها كسبانة قض*ية ورافعة راسها لفوق، وشها بقى لونه أصفر زي الليمونة الدبلانة، ومبقتش قادرة تبص في عيني.
أحمد كان الوحيد اللي حاول يتكلم، قام من كرسيه وقرب مني، وصوته كان مخنوق بالدموع والكسرة:
— دينا… عشان خاطري، بلاش فضايح، إحنا لسه في أول الطريق، الفيديو ده لو حد شافه أنا هتهيأ في الشركة، ومستقبلي هيضيع… أبوس إيدك يا دينا، خلينا نحل الموضوع ودي، وبابا هيبوس على راسك قدام الكل.
بصيت له ببرود تام، قعدت على الكرسي وحطيت رجل على رجل، وسحبت الموبايل وفصلت الوصلة اللي شاشة الكافيه كانت شغالة عليها.
— بوسة الراس دي تدوقها لأختك لما تتهان يا أحمد، مش ليا أنا. أنا دينا عبد الحميد، القلم اللي أبوك ادهوني، تمنه غالي قوي، وغالي فوق ما تتخيلوا. وقض*ية الخلع دي خلاص، المحامي شغال فيها من الصبح، والفيديو ده نسخة منه بقت تحت إيده كدليل على الضرر والإهانة علشان حقي القانوني والمؤخر وباقي حاجتي تجيلي لحد عندي، ورجليكم فوق رقابكم.
هنا الحاج عبد الفتاح حاول يستجمع شجاعته المزيفة، خبط بإيده المرتعشة على الترابيزة بس الصوت طلع ضعيف، مش زي خبطته في بيته:
— أعلى ما في خيلك اركبيه يا بنت عبد الحميد! فاكرة نفسك هتذلينا بفيديو؟ اخرتك تخلعي ابننا، والناس يومين وهتنسى، والراجل ما يعيبوش إلا جيبه، وأنا ابني مهندس يملى العين وألف مين تتمناه، والهدوم اللي سبتيها في الشقة مش هتشوفي منها قشة واحدة، وهنقول للناس إنك كنتِ بتتبلي علينا!
ضحكت.. ضحكت من قلبي لدرجة إن الناس اللي قاعدين على الترابيزات اللي برا القاعة بدأوا يلتفتوا لينا. الضحكة دي خلت الحاج عبد الفتاح يتجنن زيادة، لكن ملامحه اتقلبت لرعب حقيقي لما فتحت الشنطة بتاعتي وطلعت منها دوسيه كارتون أزرق قديم، الورق اللي فيه كان مصفر، وباين عليه مركون من سنين طويلة.
قربت من الترابيزة، وحطيت الدوسيه قدام حمايا بالظبط.
