بعد فرحي بشهر روماني مكرم 3
التليفون وقع من إيدي على السرير، وجسمي كله قشعر. اتقبض عليه؟ اتقبض عليه ليه وهو لسه مسدد الكمبيالات اللي كانت عليه بفلوس دهبي؟
طلعت جري على الصالة وأنا بصرخ: “أحمد! محمود! الحقوني!”
أخواتي جِريوا عليا وخضتهم باينة في عينيهم، حكيت لأحمد اللي شيماء قالته في التليفون وهي بتصرخ. أحمد وشه اتخشب وبص لمحمود وقاله: “كلم المحامي فوراً خليه يعرف كريم محبوس في أنهي قسم وإيه التهمة.”
ساعتين مروا علينا كأنهم دهر، وأنا رايحة جاية في الصالة باكل في ضوافري. الخوف رجع ينهش فيا تاني، رغم كل اللي عمله، لسه مكتوب على ذمتي واسمه مربوط باسمي. المحامي كلم أحمد، وأحمد رد ووشه بيتحول من الدهشة للغضب، وقفل السكة وبصلي وقال:
* “جوزك طلع غرقان ومغرق نفسه في مصايب تانية يا ندى. صاحب محل الفرش اللي كان واخد منه الكمبيالات، طلع كريم ما سددلوش كل الفلوس! كريم أخد تمن الدهب، سدد جزء، والجزء التاني أمه وأخته خلوه يشتري بيه غسالة وتلاجة لـ شيماء أخته اللي بتتجهز! وصاحب المحل لما لقى المماطلة شغالة، رفع بقية الكمبيالات اللي معاه، والنهارده القوة نزلت خدته من قفاه في وسط شغله!”
وقعت على الكنبة ومش مصدقة. يعني دهبي اتبَاع، وشقا أبويا وإخواتي طار، ومش عشان يفكوا زنقته هو.. ده عشان يجهزوا أخته من ورايا! الخيانة هنا كانت مضاعفة، والوجع بقى اتنين.
مكملناش كلام ولقينا الباب بيترزع بهستيريا. محمود فتح الباب، ودخلت حماتي وشيماء وهما عياطهم جايب لآخر الشارع. حماتي رمت نفسها تحت رجل أحمد وهي بتصرخ وبتلطم:
* “ببوس إيدك يا حاج أحمد.. ببوس إيدكم انقذوا ابني! كريم هيضيع، كريم بايت في الحجز وسط المجرمين وشغله هيروح! ماليش غيره يا بني هو اللي شايلنا!”
أحمد زقها بعيد عنه بقرف وقال بصوت جهوري:
* “ابعدي عني يا ست أنتِ! جاية تعيطي هنا ليه؟ مش إنتِ اللي قولتِ الست تساعد جوزها؟ مش إنتِ وشيماء اللي لفتوا على دماغه لحد ما أخد فلوس الدهب وجهزتوا بيه بنتك وسيبتوا الراجل يتسجن؟”
شيماء قربت مني وهي بتبكي وبتمسك إيدي بنكسار ملوش مثيل:
* “سامحينا يا ندى.. أنا آسفة، أنا غِلطت في حقك، بس وحياة أغلى ما عندك انقذي كريم. صاحب المحل طالب 150 ألف جنيه كاش عشان يتنازل عن القواضي ويفك الحبس، وإحنا معندناش الأبيض والأسود.. الفلوس اللي معاكم، فلوس الدهب اللي عمي صالح ادهالكم، ادفعوها للراجل وخرّجوا كريم، وبكرة يكتبلك بيهم اللي أنتِ عايزاه!”
