بعد فرحي بشهر روماني مكرم 3
خرجت من عند المأذون وأنا حاسة بوزن جبل انزاح من على كتفي، رجعت بيت أبويا وسط إخواتي وسندي، وعفشي مترص في الصالة. كنت فاكرة إن القصة خلصت لحد هنا، وإني هبدأ ألملم جراحي وأنسى..
لكن بعد أسبوعين بالظبط من الطلاق، وأنا قاعدة في أوضتي، لقيت محمود أخويا داخل عليا وشه غريب، وماسك في إيده جواب رسمي جاي من المحكمة باسمي!
فتحت الجواب وأنا إيدي بترتعش، وقريت السطور اللي جواه، ولقيت صدمة تانية كانت مستنياني، صدمة هتقلب الطربيزة على كريم وأمه وأخته من مكان ميعلموش بيه..
حكايات رومانى مكرم تابعو صفحه رومانى مكرم
فتحت الجواب وإيدي بترتعش، وعيني بتتحرك بين السطور بسرعة والذهول بيتملكني. الجواب مكنش قضية مرفوعة عليا زي ما توقعت، الجواب كان استدعاء رسمي ليا من النيابة كـ “شاهدة وإثبات حق” في قضية تزوير ونصب!
طلعت جري على أحمد ومحمود والجواب في إيدي وأنا بصرخ: “أحمد.. شوف الجواب ده، في إيه؟ كريم عمل إيه تاني؟”
أحمد أخد الورقة وقراها، وملامحه اتغيرت تماماً، وفجأة ضحك ضحكة عالية هزت البيت كله وبص لمحمود وقال: “يمهل ولا يهمل! داين تدان والبيوت ليها رب يحميها.. اطلب المحامي فوراً يا محمود عشان نفهم تفاصيل القضية دي ونروح مع ندى الصبح.”
تاني يوم، روحت مع إخواتي والمحامي لمكتب وكيل النيابة، وهناك عرفنا المفاجأة اللي طربقت الدنيا فوق دماغ حماتي وبنتها شيماء.
صاحب محل الفرش والكمبيالات لما لقى إن كريم سدد جزء من الفلوس واختفى، ولما لقى إن حماتي وشيماء أخدوا بقية الفلوس واشتروا بيها غسالة وتلاجة من محل تاني عشان جهاز شيماء، بدأ يفتش ورا الفواتير والضامنين. واكتشف إن حماتي عشان تضمن بنتها شيماء في المحل التاني وتشتري الحاجة بالتقسيط، أخدت “صورة بطاقتي الشخصية” اللي كانت في شقتي، وزورت إمضائي وبصمتي كـ “ضامن أول” لشيماء في وصولات أمانة جديدة من ورايا وبدون علمي!
صاحب المحل التاني لما لقى إن القسط الأول والتاني اتأخروا، وشاف المشاكل اللي حصلت لكريم، رفع الوصلات فوراً، ولما الخطوات القانونية بدأت، خبير الخطوط أثبت إن الإمضاء والبصمة مش بتوعي، وإن اللي مضت وبصمت بالزور هي حماتي، وبشهادة صاحب المحل اللي أكد إن أم كريم وبنتها هما اللي جابوا البطاقة ومضوا قدامه!
وكيل النيابة بصلي وقال: “يا مدام ندى، المتهمة (عنايات) والدة طليقك، والمتهمة الثانية (شيماء) أخته، تواجهان تهمة التزوير في أوراق رسمية والنصب واستغلال حسن النية. هل عندك علم بالواقعة دي؟ أو مضيتي للناس دول على حاجة؟”
