جوزي رمى 1500 جنيه 1
ـ أهلاً بيكي يا حاجة.. حمد لله على السلامة.
قعدت الحاجة أمينة، وبصت للبيت، وبعدين بصت لكريم وقالت:
ـ ها يا ابني.. العمليات اخبارها إيه؟ والفلوس اللي بعتهالك من أسبوعين عملت بيها إيه؟ الدكتور قال إيه على رجل أختك؟
هنا.. كريم اتصلب في مكانه. الابتسامة اختفت من على وشه في ثانية، وبص لمريم بخوف مكتوم، لكن مريم فضلت قاعدة بتشرب العصير بكل برود، وكأنها مش سامعة حاجة.
كريم بلع ريقه وصوته اتهز وهو بيرد:
ـ هـ.. أصل الدكتور.. قصدي الحسابات في المستشفى يا أمي.. أصلهم أجروا العملية ولها بقية..
قاطِعته مريم بصوت واطي وناعم، لكنه ينزل زي الساطور:
ـ عملية إيه يا كريم؟ مش الفلوس دي اللي أخدتها عشان الشغل ومكانتك؟
الحاجة أمينة حطت كباية العصير على الترابيزة بحدة، وصوت خبطة الزجاج على الخشب رن في الصالة.
ـ شغل إيه ومكانة إيه؟ الفلوس دي 74 ألف جنيه.. بعتهم لكريم من تحويشة عمري وبيع حتة الأرض الصغيرة عشان عملية أخته مروة في ركبتها! هو قال لي المستشفى طالبتهم كاش عشان يبدأوا الترتيبات!
كريم عرَق، وبدأ يمسح رقابته بياقة القميص اللي كان واقف يظبطها قدام المراية من يومين.
ـ يا أمي استهدي بالله.. الفلوس معروضة في حساب المستشفى، بس الإجراءات…
مريم قامت بهدوء. مشيت ناحية الأوضة، وخرجت وفي إيدها إيصال واحد.. الإيصال المتني اللي طلعاوه من جيب البدلة.
حطت الإيصال على السفرة.. قدام الحاجة أمينة مباشرة.
ـ ده الإيصال يا حاجة. 74 ألف جنيه بالتمام والكمال.
الحاجة أمينة مسكت الورقة. عينها مشيت على السطور..
“جنوط سبور مستوردة: 46 ألف… كاوتش فاخر: 28 ألف… تم دفع المبلغ بتحويل من: أمينة عبد السلام.”
البيت بقى فيه صمت مرعب. حتى صوت عربية الفول اللي في الشارع اختفى.
الحاجة أمينة بصت للورقة، وبعدين رفعت عينها لكريم. ملامحها اتغيرت من الست الطيبة اللي جاية تزور ابنها، لست صعيدية أكلت الشقا بعرقها وقسوتها.
ـ جنوط؟
قالت الكلمة بهمس يخوف.
ـ بتسرق فلوس عملية أختك المريضة يا كريم؟ عشان تركب حتت حديد في عربية كراكيب؟
كريم قرب منها بخوف ويديه بترتعش:
ـ يا أمي نفهمي.. أنا كنت هرد الفلوس أول ما القرض ينزل.. أنا محتاج المنظر ده في الشركة.. رئيس القطاع قال لي لازم…
قاطعه صوت كف ينزل على وشه بكل قوة. صوت ضربة خلت مريم نفسها تتراجع خطوة للورا.
