بنت مرات بابا وجوزها أماني السيد ١
بس بسرعة طردت الفكرة من دماغي.
أنا مش جاية هنا عشان أحن عليها، أنا جاية عشان أرجّع حق أمي.
وده اللي كنت بقوله لنفسي كل يوم.
بعد أسبوع، بابا اتصل بيا.
أول ما شفت اسمه على الموبايل، استغربت، لأن بابا عمره ما كان بيتصل بيا إلا لو محتاج حاجة أو عايزني أروح له.
رديت: ـ أيوه يا بابا.
قال بصوت متوتر: ـ إنتِ فين دلوقتي؟
ـ في البيت، فيه حاجة؟
ـ عايزك تيجي لي ضروري، لوحدك.
قفلت معاه، وفضلت أفكر يا ترى عايز إيه. قلت لأدهم إني رايحة أزور ماما، ونزلت على بيت بابا.
أول ما دخلت، لقيته قاعد في الصالة، وشكله متغير، ومراته سعاد قاعدة جنبه، وسمر واقفة عند الشباك ووشها أحمر من العياط.
بابا أول ما شافني قال بعصبية: ـ إنتِ إيه اللي عملتيه فينا ده؟!
بصيت له باستغراب مصطنع: ـ عملت إيه يا بابا؟ هو أنا عملت حاجة؟
سعاد قامت من مكانها وقالت: ـ بلاش تمثيل! إنتِ عارفة كويس إنتِ عملتي إيه. إنتِ دخلتي بيت بنتي وخدتي جوزها منها، ولسه كمان بتتباهِي قدامها!
بصيت لها، والسنين كلها عدت قدام عيني في لحظة.
افتكرت أمي وهي قاعدة مستنيّة بابا يرجع، والأكل يبرد على الترابيزة، وأنا صغيرة أسألها: هو بابا اتأخر ليه؟
كانت تبتسم وتقول لي: ـ عنده شغل يا حبيبتي.
كبرت وعرفت إن الشغل كان مجرد حجة، وإن فيه بيت تاني وناس تانية كانوا بياخدوا من وقت بابا واهتمامه أكتر مننا.
رجعت بصيت لسعاد وقلت بهدوء: ـ غريبة أوي يا طنط! إنتِ زعلانة ليه؟ هو مش ده اللي كنتِ شايفاه عادي لما ماما كانت بتعيشه؟ ولا الوجع بيبقى حلو لما يكون في بيت غير بيتك؟
وشها اتغير، وبابا صرخ: ـ إنتِ بتتكلمي مع مرات أبوكي بالطريقة دي ليه؟!
بصيت له وقلت: ـ مرات أبويا؟ طب وماما كانت إيه يا بابا؟ كانت مراتك برضه، ولا أنا غلطانة؟
سكت.
لأول مرة في حياتي، بابا ما لاقاش رد يقوله.
كملت وأنا حاسة إن صوتي بيترعش: ـ أنا من صغري كنت بشوفك بتيجي لنا يوم ولا يومين، وبعدها تختفي. كنت بشوفك بتجيب لسمر كل اللي نفسها فيه، وأنا بنتك أقعد أطلب منك مصاريف المدرسة كأني بطلب صدقة. ماما كانت بتدافع عنك قدامي، وتقول لي استحملي عشان خاطركم. تعرف يا بابا؟ أنا كنت بزعل منها أوقات، مش عشان هي وحشة، لكن عشان كانت بتعلمني أستحمل وجع إنت السبب فيه!
بابا نزل عينه في الأرض.
