تزوجت عن حب بقلم أماني السيد
.. لو فيه أي مشكلة، قوليلي. بصيتله باستغراب مصطنع. مشكلة إيه؟ يعني… لو محتاجة فلوس… أو أي حاجة. ضحكت لأول مرة من قلبي. ضحكة خلت وشه يحمر. فلوس؟! دلوقتي افتكرت الفلوس؟ مردش. كمل يتفرج في الأرض. … وفي اليوم اللي بعده، وأنا راجعة من الشغل، كان فيه عامل نقل واقف تحت العمارة.
أول ما شافني قال حضرتك مدام فوزية؟ أيوه. ناولني كرت صغير. اتفضلي… ده معاد التسليم. بصيت في الكارت بسرعة، وحطيته في شنطتي. في نفس اللحظة، سعيد كان راجع من الناحية التانية. شاف العامل بيديني الكارت. جري علينا. فيه إيه؟ العامل رد بمنتهى الأدب معلش يا فندم… ده خاص بالمدام.
.. ده خاص بالمدام. وسابنا ومشي. فضل سعيد يبص للكارت اللي اختفى جوه شنطتي، وبعدين بصلي. تسليم إيه؟ ابتسمت وأنا طلعت مفتاح الشقة. اصبر… كلها أيام. دخلت وسيبته واقف قدام الباب، الحيرة بتنهش فيه. أما أنا، فكنت عارفة إن كل خطوة محسوبة.
وإن اللحظة اللي هيعرف فيها الحقيقة قربت… لكن لسه بدري جدًا إنها تتكشف من اليوم ده، سعيد مبقاش بيخبي توتره. بقى يصحى من النوم يبص ناحيتي، ولو خرجت قبله ينزل يجري على البلكونة يشوف رايحة فين. أما مراته، فبدأت تتضايق.
في مرة قالتله وهي فاكرة إني مش سامعة إنت مالك بيها كده؟ ما أنت اللي كنت عايز تتخلص منها! رد بعصبية أنا مش مالي بيها… أنا بس عايز أفهم هي بتعمل إيه. قالت وهي مبرومة ولا يكون ناوية تتجوز؟ بصلها بضيق وقال إيه الكلام الفارغ ده!
لكن أول ما قالت الجملة… فضلت ترن في دماغه. … بعد يومين، كنت قاعدة في الصالة براجع شوية أوراق. دخل سعيد وقال بتردد فوزية… لو حبيتي تبدأي حياة جديدة… أنا مش هقف في طريقك. رفعت عيني من الورق.
تقصد إيه؟ يعني… لو في حد متقدم أو… قاطعته بابتسامة هادية. متقلقش يا سعيد… أنا بعرف آخد قراراتي كويس. الكلمة كانت كفاية تخليه يعض على شفايفه من الغيظ. … في نفس الأسبوع، رجعت من الشغل ومعايا نجار. قلت له لو سمحت، شوفلي المقاسات دي.
النجار لف في الصالة وقاس الحيطة والشباك وباب الأوضة. سعيد خرج من أوضته بسرعة. هو فيه إيه؟ قلت بمنتهى الهدوء شغل. شغل إيه؟ تعديل بسيط. تعديل في إيه؟ هتعرف لما يخلص. النجار خلص ومشي، وسعيد فضل يبصلي وكأنه هيجن. … بالليل، صحيت على صوت همس خارج أوضتي.
