جهاز بنتي حكايات زهرة 1
الكلمة كانت زي السكين في قلبي. أبيع حاجة بنتي اللي نقيتها حتة حتة؟ أبيع العفش اللي كانت فرحانة بيه ومستنيه تستعمله في شقتها؟ قلبي كان بيتقطع، بس لقيت إن ده الحل الوحيد المتاح، عشان ابني اللي لسه صغير وما لوش ذنب، وعشان أقدر أفك وأجيب العلاج اللي يخليني أقف على رجلي واكمل.
خبطنا، وسليم فتح الباب. أول ما شافنا بص لنا ببرود ومنطقش بحرف .
دخلت الشقة، وقفت متسمرة في مكاني… الصدمة شلت لساني!
الشقة على البلاط! مفيش حتة خشبة، مفيش جهاز واحد، مفيش سجادة ولا ستائر ولا أي حاجة من اللي شقينا فيها وفرشناها بإيدينا! المكان فاضي تماماً كأنه ما دخلوش بشر قبل كده.
عيني زغللت، وقولت بذهول وانا مش مصدقة اللي شايفاه: “إيه ده؟! عفش بنتي فين؟! الحاجة اللي فرشناها راحت فين يا سليم يا ابني؟!”
بص لي بمنتهى البرود والحقارة، وابتسم ابتسامة صفرا وقال لي: “أنتي بتهزري؟ عفش إيه ده اللي بتسألي عليه؟! ولا عشان بنتك ماتت عايزة تطلعي بسبوبة من وراها وتتبلي عليا؟! أنا محدش جابلي حاجة هنا!”
بس الوساخه موقفتش هنا واللي عمله بعدها خلاني اتيقنت ان ربنا رحم بنتي لما خدها قبل الجوازه دي ؟؟؟
وقف سليم يسد باب الشقة بجسمه، ونظراته كانت مليانة كبر وحقارة ما شفتهاش في بني آدم قبل كده. قرايبي اللي كانوا معايا وقفوا مصدومين، ومحدش كان مصدق إن الوش الهادي المحترم اللي جيلنا بيه البيت يختفي ويحل محله الوش ده.
أنا مسكت في حافة الباب، ودماغي كانت بتلف. قلت له وصوتي بيتخنق من العياط والذهول: “أتبلى عليك؟! أنت بالنصب يا سليم؟ ده إحنا فرشنا الشقة دي بإيدينا من أسبوع واحد بس! الستائر اللي كانت متعلقة هنا، الأجهزة اللي كرتونتها لسه مرمية في البلكونة، اللي اخترناها بالشيء الفلاني.. راحت فين؟!”
رد بضحكة مستفزة وهز كتفه وقال: “والله دي مشكلتك أنتي، دوري على حاجتك في الحتة اللي أكلتيها فيها. دي ملكي وبتاعتي، ومفيش كرتونة واحدة دخلتها من طرفكم. عندك إثبات إنك جبتي حاجة هنا؟ وريني فواتيرك ولا وصلاتك، ولو جدعة روح أعملي بلاغ في القسم.. بس اعملي حسابك، البلاغ الكاذب فيه ، وأنتي ست كبيرة ومحتاجة صحتك عشان المحاكم!”
الكلام نزل عليا زي الصاعقة. حسيت إن الأرض بتميد بيا، وقرايبي بدأوا يتكلموا ويزعقوا معاه: “اتقي الله يا جدع! البنت لسه في تربتها ومجفش عليها التراب! بتاكل حق أيتام وست أرملة؟!” لكنه ولا اتهز، بصلهم بكل قسوة وراح زاقق الباب في وشنا وقافله بالمفتاح من جوة.
