التكييف حكايات روماني مكرم 1
أمه اندفعت قبل ما حد يتكلم، وحطت إيدها على صدرها وبدأت تمثل الدور:
* تعالى يا محمود! تعالى شوف الست هانم الموظفة اللي جايبها تقعد في خيرك، واقفة بتشتمني في الشارع وتقول عليّ حرامية! عشان خدت الميكرويف لأختك الغلبانة تسخن فيه أكل عيالها بدل ما هو محطوط عندك زينة! بتقل خيرك على أختك عشان حتة بتاعة صاج!
محمود بص لي بعتاب وضيق، وقال بنبرة هادية بس مموتة قلبي:
* يا عبير.. جرى إيه بس؟ هي كبرت في رأسك ليه كده؟ أختي مش غريبة، وبعدين أمي خدته بعلمي.. أنا كنت هقولك لما أرجع!
الجملة دي نزلت عليّ زي المية المغلية.. “أني خدته بعلمي”!
وقفت أترعش وبصيت له بذهول:
* بعلمك؟! يعني أنتِ اديتها مفتاح الشقة ودخلت في غيابي طلعت حاجتي اللي بقسطها من مهيتي بفلوس شغلي وطردي وشقايا؟ أنتِ بتستغفلني يا محمود؟
محمود مسك دراعي بيحاول يداري الموقف قدام الشارع وقال بصوت واطي:
* أوعي تعلي صوتك عليّ! أختي ظروفها على قدها، وأنتِ معاكِ مرتبك وتقدر تجيي غيره، وبعدين أمي طلبت مني الميكرويف والتكييف عشان أختك، وأنا قولت الميكرويف مش مشكلة نراضيها بيه بدل التكييف اللي عاملي مشكلة! اهدكِ بقى وكبري مخك وما !
في اللحظة دي، حسيت إن السقف اتهد على دماغي. محمود مش بس ضعف قدام أمه، محمود فتح باب شقتي وشرعني وخان أمانتي وباع شقايا عشان يشتري رضا أمه على حساب كرامتي.
حماتي ابتسمت ابتسامة النصر الخبيثة وقالت لسمر:
* اركبي يا بت العربية، أخوكي سي السيد في بيته وعارف أصوله، مش زي ناس!
سمر ركبت وجوزها دور العربية ومشيوا. ومحمود مسكني من دراعي بيزقني بالراحه عشان نطلع الشقة:
* يلا اطلعي فوق بلاش فضايح، الناس بتبص علينا من البلكونات.
نفضت إيده عني بكل قوتي، وبصيت له بعين مليانة كره وقرف من الضعف اللي هو فيه، وقولت بصوت ثابت وهادي هز الشارع كله:
* الشقة دي أنا مش طالعة فيها تاني يا محمود.. والميكرويف ده مش هسيبه، لا هو ولا التكييف ولا أي حاجة بابا جابهالي أو اشتريتها بقرشي.. أنت بعتني وخنت أمانتي عشان أرضيت أمك، وأنا مش هعيش مع راجل بيمد إيده في جيبي وياخد شقايا يديه لأهله!
لفيت وشي ومشيت في الشارع بخطوات سريعة ودموعي نازلة تحرق وشي، ومحمود ينادي ورايا بغضب:
* عبير! استني هنا! لو مشيتِ دلوقتي مش هترجعي تاني! لو مشيتِ هتبقى أنتِ اللي اخترتِ!
