طلبت من حماتي روماني مكرم ١

طلبت من حماتي تشيل عني ابني اللي لسه مكملش أربع شهور على ما أروح أمتحن في كليتي وأرجع، لقيتها بتلوي بوزها وبتقولي ببرود يفرس: «مش شغلتي يا حبيبتي، عيلك وميلزمنيش!».. وفي ثانية لقيت سلفتي بتمد إيدها وعينيها فيها نظرة تخوف، وقالتلي بخبث: «سيبيهولي يا أختي وأنا عيني عليه».. ويارتني ما استعذت من الشيطان وخدته في حضني ومشيت، يارتني اتقيت شرها وعرفت هي ناويه على إيه.. اسمعوا بس اللي جرى لي من أوله!صحيت من النجمة على صريخ الواد وهو بيتلوى من الجوع. . حتة لحمة حمرا لسه متمش أربع شهور، وأنا طالع عيني في آخر سنة في الجامعة وخلاص بتخرج. قلبي كان هيقف من القهر وأنا بذل نفسي لحماتي وبترجاها: «أبوس إيدك يا أمي، ساعتين زمن على ما أحل الامتحان وأرجع»، ردت عليا بنشفان ريق: «مش شغلي.. ولا تروحي ولا تتنيلي، خليكي جنب ابنك!»هنا بقى دخلت سلفتي اللي من يوم ما خطيت عتبة البيت ده وهي حاطاني في دماغها وعايزة تفركش عيشتي، مدت إيدها بخبث وقالت: «هاتيه يا حبيبتي، ده في عنيا متقلقيش. .»سحبت الواد في حضني بحركة لا إرادية وقولتلها وريقي ناشف: «تسلمي، مش هغلب فيه»، ولمحت في عينها شر وغل يهد جبال، بس طنشت وجريت. قولت لنفسي وأنا بلفه: «لو وقفت هنا.. كل الشقا والسهر وحلم السنين عشان أكون دكتورة وأرفع راس أهلي هيترمي في الأرض!»لفيته في كوفية تقيلة، وعملت له الرضعة على عجل، ونزلت أجري بيه. السكة للكلية كانت جحيم.. الشمس بتشوي، والشارع مكسر وتراب وحصى بيقطع في رجلي، بس كلام أمي كان بيرن في ودني زي الجرس: «يا بتي، شهادتك هي سلاحك وعكازك في الدنيا دي، التعليم مش لعب!»كنت بدوس على الوجع وبمشي. . وصلت الكلية هدومي متبهدلة وعرقانة، والعيون كلها بتاكل فيا: «شوفي البت.. جاية تمتحن بالرضيع؟!»بس أنا نفضت ليهم كلهم ورفعت راسي، خلاص ما عادش يفرق معايا حد. دخلت اللجنة والواد على كتفي، المراقبة تنحت وقالتلي: «هتعرفي تركزي وتمتحني كده؟»قولتلها بعين مليانة عند: «أيوة هعرف.. وهحل.»الست قلبها رق وقالتلي: «توكلي على الله، ولو زن متقلقيش هنراضيه.»وبدأ الامتحان.. الورق اتوزع ومن هنا الواد حس باللخبطة وفضل يصرخ ويزعق! إيدي كانت بتترعش على القلم ودموعي غصب عني نزلت، بس فجأة لقيت المراقبة شالته بحنية وفضلت تهز فيه وتطبطب عليه في آخر القاعة، وسابتني أكتب. كتبت بكل غل، خلصت وسلمت ورقتي وأنا حاسة بانتصار ميتوصفش، حضنت ابني وبوسته وقولت خلاص الهم زال!رجعت البيت على عمايا، يدوب دخلت لقيت حماتي مستنياني على الباب زي القضا المستعجل: «اغسلي المواعين، اطبخي الغدا، البيت يبرق!»#الكاتب_رومانى_مكرم_كنت شغالة زي المكنة، دموعي على خدي وبدعي على أبويا اللي رماني في بيت عمي لجوازة سودة من راجل مسافر برا ولا سائل فيا ولا في ابنه. قولت يلا أهو ابني في أمان جوا ونايم، لحد ما فجأة. . شق البيت صريخ حماتي وهي بتلطم وتصوت بعلو حسها!ركبي خابت والدنيا اسودت في وشي، جريت زي المجنونة على الصالة، واللي شوفته ساعتها هد حيلي.. سلفتي كانت عامله في ابني....ركبي خابت والدنيا اسودت في وشي، المواعين وقعت من إيدي اتكسرت ميت حتة، والمية السخنة طرطشت على رجلي مكنتش حاسة بيها أصلاً من خضة قلبي. . جريت زي المجنونة وطرحتي مفكوكة وبتجرجر ورايا على البلاط، وصلت الصالة لقيت حماتي بتلطم على خدودها بعلو حسها وصوتها بيجلجل في العمارة: «يا خيبتك يا ميلة بختك يا بني! الواد مات.. لحمك ساح يا ابني في بلاد الغربة!»وقفت مصلوبة على الباب وعيني راحت للكنبة.. سلفتي كانت واقفة فوق راس ابني، ماسكة إزازة دوا كحة غامقة في إيد، وبزازة الرضعة في إيد تانية، والواد على الكنبة وشه أزرق زي النيلة، شفايفه بتطلع رغاوة بيضا خفيفة، ونفسه مكتوم وعينه مقلوبة لفوق مفيهاش حس ولا حبة رمشة! سلفتي أول ما شافتني رمت الإزازة على السجادة وصرخت بدموع تماسيح وخبث يخر من عينيها: «الحقيني يا حماتي! دخلت أطل عليه لقيته ميت في جلده ومقطع النفس، البت دي سقيته حاجة قبل ما تخرج للجامعة ونزلت عشان تخلص منه ويبقى هم وانزاح عن كتافها وتشوف مستقبلها!»حماتي هجمت عليا زي الكلبة المسعورة، شدتني من شعري وقالتلي وهي بتتف في وشي: «يا قتالة القتلا! بقى هو ده اللي ربنا قدرك عليه؟ الواد كان في حضنك طول الصبح، عملتي فيه إيه يا فاجرة؟ ! عايزة تقهري ابني في ضناه يا وش الفقر؟!»الدم كان بيغلي في نفوخي، بس صوت أنفاس ابني المكتومة كان هو اللي شادد روحي من قفاها.. زقيت حماتي بكل قوتي وبغل عمري ما حسيته، طيرتها خطوتين لورا وخليتها تقع على طرف الفوتيه، وجريت زي النمرة على الكنبة، خطفت ابني في حضني. . جسمه كان متلج، متخشب، ونبضه عمال يدق بضعف يخوف، وقربت مناخيري من بقه.. ريحة دوا تقيل، ريحة مهدئ مسكن رخيص ريحته تصدع الحجر!بصيت على الأرض، لقيت غطا إزازة نقط منومة مهدئة بتاعت حماتي اللي كانت بتشتكي من الأرق وبتستعملها بالقطارة، الإزازة واقعة تحت رجلين سلفتي ومفتوحة، والقطارة غرقانة في قلب لبن الرضعة اللي سلفتي جهزته!بصيت لسلفتي وقولت بصرخة قطعت حبال صوتي: «ده دوا حماتك المنوم يا عقربة! أنتي حطيتي القطارة بحالها في اللبن عشان تخلصي منه ولا عشان تفصلي له نفسه وتلبسيني المصيبة؟!»سلفتي وشها اصفر للحظة، بس سرعان ما قلبتها ندب وعياط: «أنا؟ ! أنا اللي قلبي رحيم وبقول عيل صغير مسكين أعمله رضعة دافية وأنتِ هاملة البيت ورايحة تتمايعي في الكليات؟! بتتبلي عليا يا مفترية؟! ده دواكي أنتي اللي شربتيهوله الصبح عشان يخرس في اللجنة وتعرفي تمتحني يا عديمة الرحمة!»حماتي صدقتها في ثانية، وقامت نفضت هدومها ورفعت الشبشب وجاية عليا: «أقسم بالله لو الواد حصله حاجة لأمسح بكرامتك الأرض وأخلي ابن عمك يطلقك برصاصة مش بورقة! ده ضنا الغالي يا بت الجعانين!»محستش بنفسي.. مبقاش في دماغي لا حماتي ولا سلفتي ولا كرامة ولا طلاق، ابني كان بين إيديا روحه بتتسحب زي الشعرة من العجين.. ضميت الواد لصدري، ولفيت بيه زي الإعصار وفتحت باب الشقة ورميت نفسي على السلم.. نزلت السلالم قفز، كل تلات درجات في خطوة، وأنا حافية من غير جزمة والهدوم مبلولة مية وغسيل وصوتي بيهز الشارع: «إلحقووووني! حد يلحق ابني! حد يوقف تاكسي يا خلق الله!»الجيران طلعوا على الشبابيك زي النمل، والناس في الشارع اتلمت.. في لمح البصر لقيت راجل سواق توك توك من ولاد الحلال وقف فجأة على أول الحارة وزعق: «اركبي يا أستاذة.. اركبي بسرعة على مستشفى الحميات!»ركبت ورا، حاضنة الواد اللي كان بيرمي راسه لورا، بحط صباعي الصغير في زوره عشان أخليه يرجع، بضغط على بطنه بالراحة وبشهق من البكا وأقوله: «عشان خاطري يا يوسف.. عشان خاطر أمك متسيبنيش.. ده أنا بهدلت روحي عشانك، أنا شقيت عشان أرفع راسك وأعملك قيمة، متكسرش ضهري يا ابني في بلاد الغربة وأبوك بايعنا!»الواد رجع شوية لبن ممزوج بريحة الدوا المُرّة، وعطس عطسة ضعيفة خلت روحي ترد فيا ثانية، بس لسه عنيه دبلانة ومغمضة. السواق طار بالتوك توك، كسر إشارات ومشي عكس لحد ما رماني قدام باب الطوارئ.. نزلت بجري بيه، صرخت في وش الدكاترة والممرضين: «واخد جرعة منومة مركزة.. واخد نقط منوم للكبار!»في ثانية التموا عليه، خطفوه من إيدي ودخلوا بيه أوضة الإنعاش وقفلوا الباب في وشي.. الباب الأزرق الحديد اترزع، ووقفني وراه زي العيل التايه.. قعدت على بلاط المستشفى البارد، دموعي غسلت وشي، وهدومي متبهدلة تراب ولبن، ورجلي بتنزف من زجاج المواعين اللي دُست عليه وأنا نازلة ومحستش بيه إلا دلوقتي. ساعة مرت عليا.. كأنها ستين سنة في جهنم. . الدكتور طلع وهو قالع الجوانتي وعرقه مالي جبينه.. وقفت بسرعة ومسكت في بالطوه: «ابني يا دكتور؟ ابني لسه عايش؟! قولي بربنا عايش؟!»الدكتور اتنهد تنهيدة طويلة وقال: «الحمد لله، عملناله غسيل معدة فوري.. لحقتيه على آخر دقيقة، الجرعة دي كانت كفيلة توقف عضلة القلب لطفل في سنه.. بس هو حالياً محطوط على المحاليل ومحتاج يفضل تحت الملاحظة أربع وعشرين ساعة.. بس قوليلي يا مدام، الحاجات دي مبتتسبش في إيد عيل، دي كمية منوم متتحطش لراجل شاحط، إيه اللي حصل بالظبط؟! ده بلاغ رسمي وتسمم جنائي!»كلمة «تسمم جنائي» نزلت على نافوخي زي الصاعقة. . مسحت دموعي بإيدي، وفجأة حسيت ببرود غريب سكن في عروقي، كل الخوف اللي كان في قلبي اتبخر واتحول لكتلة نار.. النار اللي هتولع في البيت ده باللي فيه. قولت للدكتور بصوت ثابت ومبحوح: «مفيش بلاغ دلوقتي يا دكتور.. اديني التقرير الطبي بتاع غسيل المعدة ونسبة السموم في دمه، وأنا اللي هجيب حقه بتمنه تالت ومتلت.»الدكتور استغرب نظرتي اللي اتغيرت من الانهيار للجمود، بس كتب التقرير وختمه وسلمهولي.. دخلت شوفت يوسف، كان متوصل بالمحاليل، وشه راجع يورد شوية ونايم هادي. . بوست إيده الصغيرة وقولتله بهمس: «حقك مش هيضيع، وحقي من كل لحظة قهر وذل في البيت ده هاخده النهاردة.»سبت ممرضة أمينة جنبه بعد ما استحلفتها بربنا واديتها حلق دهب كان في ودني عشان تفضل عينيها عليه، وركبت نفس التوك توك ورجعت البيت.. بس مرجعتش الضحية اللي بتبكي وتترجى عشان تروح امتحانها.. رجعت واحدة تانية خالص. طلعت السلم خطوة بخطوة، والهدوء اللي كان في مدخل العمارة كان يسبق العاصفة.. فتحت باب الشقة بالمفتاح بالراحة ودخلت مسمعتش صوت.. كان البيت هادي خالص.. مشيت على طراطيف صوابعي ناحية أوضة نوم سلفتي اللي كان بابها موارب، ووقفت أسمع الهمس اللي طالع من جوا. .لقيت سلفتي بتكلم حد في التليفون وبتقول بضحكة واطية مليانة شماتة: «بقولك إيه.. زمان الواد مات في إيدها خلاص، وهلبسها إنها كانت مستعجلة على كليتها وخنقته عشان تخلص من قرفه والبيت يفضى لي أنا وعيالي.. وحماتي واقفة في صفي ومصدقاني، وجوزها في الخليج هيبعتلها ورقة طلاقها في أول طيارة، وهخليها ترجع لأبوها مكسورة الرقبة ومشلولة العار. .»وفجأة.. صوت حماتي جه من وراها في الصالة وهي بتزعق: «بتكلمي مين يا بت؟ فين الولية دي مراحتش تدفنه ولا لسه بتشحت بيه في المستشفيات؟!»هنا بقى.. رفعت التقرير الطبي في إيدي، وفتحت باب أوضة سلفتي برجلي ورزعته في الحيطة بكل طاقتي.. وبصيت للاتنين وعيني بتقد شرار! \