ابني اتصل بيا زهرة الربيع 4
تابعو صفحه رومانى مكرم
القلم كان تقيل في إيد حازم كأنه مصنوع من رصاص. بص للورقة البيضاء اللي هتجرده من كل حاجة، وبص وراه على باب الزنزانة الضلمة، وافتكر نظرة الشماتة في عين حماه.
”حاضر.. همضي، بس أخرج من هنا.”
نطقها حازم بصوت مكسور وهو بيدوس بالقلم على الورق، ومضى وبصم على التنازل عن العربية ونصيبه في شقة السيدة زينب. كتب نهايته المادية بإيده عشان يشتري حريته.
المحامي رفعت خد الورق ببرود، حطه في شنطته الدبلوماسية، وطلع دفتر شيكات ومضى شيك بمبلغ 350 ألف جنيه باسم النيابة لصالح نهى وأبوها كقيمة القايمة. بص لحازم وقال له جملة واحدة قبل ما يمشي: “الشيك ده مقبول الدفع يا حازم بيه.. والدتك سددت دينك، بس سحبت منك آخر مليم وآخر شبر كان بيربطك بدمها. الحاجة عايدة حجزت تذكرة طيران ورايحة تعيش مع أختها في الكويت، وقالت لي أقولك: (الحساب بيني وبينك بقيت قفلته فوق عند ربنا).”
في نفس اليوم بالليل، الإجراءات خلصت والكلبشات اتفكت من إيد حازم. خرج من باب القسم وهو مش حاسس برجله. الشارع كان زحمة، والناس بتجري، وهو واقف في وسطهم زي الِجــ,,ـــــثه. معندوش عربية، الشقة الفخمة مشمعة، وحسابه في البنك محجوز عليه، ومبقاش حيلته في الدنيا كلها غير هدومه المبهدلة وساعته اليدوية، والـ 120 جنيه اللي كانوا فاضلين في جيبه.
جر رجليه لغاية ما وصل الشقة القديمة بتاعة السيدة زينب، الشقة اللي مضى تنازل عنها بس لسه معاه مفتاحها لحد ما مؤسسة الأيتام تستلمها. دخل وقفل الباب وراه، اترمى على الكنبة البلدي والدموع ناشفة في عينه. نام من كتر التعب والقهر.
تاني يوم الصبح، تليفونه رن. كان رقم المحامي بتاع نهى: “أستاذ حازم، الشيك بتاع القايمة وصل وصرفناه. نهى بتبلغك إنها مش عايزة محاكم تاني، والماذون مستنيك بكرة الساعة 6 بالليل في مكتبه بالدقي عشان تطلقوا بالإبراء، وإلا هترفع قضية خلع وتمنعك من رؤية ابنك اللي جاي في السكة.”
حازم رد بجمود: “هاجي.. قولها تحضر، مبقاش عندي حاجة أخسرها.”
الساعة جت 6 المغرب تانى يوم، وحازم واقف قدام مكتب المأذون في الدقي. لقى نهى قاعدة، لابسة نضارة شمسية سوداء وماركة غالية، وجنبها أبوها وأخوها الصايع. نهى حتى مبصتش في وشه، كانت بتتعامل معاه كأنه حشرة أو شحات واقف في الصالة.
