في رمضان بقلم أماني السيد ٣
قرب منها خطوة وقال برجاء: “خلاص يا عواطف، أنا اعترفت وندمت، هعوضك عن كل دمعة نزلت منك، وهنجيب دهبك تاني حتة حتة، ومش هخليكي إنتِ ولا العيال تحتاجوا لمليم من حد تاني.”
هزت راسها برفض وقالت: “أنا مش عايزة دهب يا أيمن، ولا عايزة منك وعود براقة جديدة ما وراهاش أفعال. أنا كنت عايزة راجل حقيقي يحس بيا وبوجعي من غير ما أضطر أبيع دهبي وأتهان عشان أفهمه إني تعبت ومحتاجة سند، وكنت عايزة أبقى شريكة حقيقية في حياته، مش مجرد أداة رخيصة بيستغلها عشان يوفر فلوسه وقت ما يعوز.”
قال بصوت مكسور: “طيب يا عواطف، اديني فرصة واحدة بس أصلح اللي أفسدته.”
بصتله طويلًا وبألم، وبعدها قالت: “الفرصة الحقيقية كانت قدامك طوال الشهر يا أيمن. كانت قدامك لما لقيتني تعبانة وناشفة ومش قادرة أقف على رجلي، ولما طلبت منك فلوس بسيطة للبيت واتخانقت معايا وكأنها جريمة، ولما عيالك استنوك بالساعات تاخدهم يشتريوا لبس العيد وإنت خرجت وسيبتهم في الشارع مكسورين. كنت تقدر تصلح كل ده في وقته وبكل حب، لكنك اخترت ما تعملش كده.”
نزل عينه للأرض بخزي وسكت شوية، وبعدها قال بصوت خافت: “يعني إنتِ خلاص مش عايزاني في حياتك نهائي؟”
ردت عليه والدموع لمعت في عيناها بصعوبة: “أنا مش عايزة أرجع أعيش معاك وأنا مرعوبة وخايفة من بكرة ومن الجاي. مش عايزة أضل مستنية في قلق أشوف هتوجعني بإيه المرة الجاية، ولا كل ما أطلب طلب بسيط أعمل ألف حساب إنك ممكن تبيعني وتستغلني. أنا تعبت يا أيمن، وتعبت أكتر من إني بقيت مش عارفة أصدقك حتى ونت بتقولي بلسانك إنك عايز تصلح.”
حاول يمد إيده ويمسك إيدها بخشونة، لكنها رجعت إيدها بهدوء وحسم.
قال بضعف: “عواطف.. أنا لسه بحبك على فكرة.”
بصتله بحزن دفين وقالت: “يمكن تكون بتحبني بطريقتك الخاصة، لكن طريقتك دي يا أيمن وجعتني أكتر ما أي حد ممكن يستحمل. وأنا مش هقدر أرجع أعيش نفس الكابوس لمجرد إنك قررت النهارده إنك مش عايز تتجوز وخايف على مصلحتك.”
خرج من المطبخ وهو ساكت ومنكسر الرأس، وقعد مع العيال شوية لحد ما جه وقت العشا. حاول يتعامل معاها كأن مفيش أي حاجة حصلت، وسألها إذا كانت جهزت الأكل، لكنها قالتله بكل هدوء إن الأكل محطوط على السفرة وإنه يقدر ياكل مع أولاده براحته. ما عملتلوش الأكل المفضل بتاعه اللي كان بيحبه زمان، وما فضلتش تلف حواليه زي زمان، لكنها في نفس الوقت ما أهانتوش ولا حاولت تقلل منه أو تنتقم لنفسها.
